رسم حدودنا

::Photo credit goes to its owner::

في ورشة Pink مُحاضِرتنا الجميلة “آية منير” طرحت نقطة مهمة جدا، “الحدود /boundaries

أن من حق أي بشري أنه يضع حدود للآخرين، ولنفسه كمان في التعامل.. ومفيش شرط معين للقيام بدا، يعني حدودك أنت وحدك المسئول عنها، وأنت الوحيد اللى تقرر عايز إيه ومش عايز إيه، وتستقبله إزاي، وفي الوقت بتاعك أنت فقط.

لذا مفيش حدود قديمة وحدود جديدة، مفيش حدود “أوفر” وحدود متساهلة .. بل هي كلها “حدودك أنت” ومش من حق أي حد غيرك أنه يناقشك فيها ولا يقولك بتعمل ليه كدا.

وفي نفس الوقت، من حق الطرف الآخر – المُستقبل – أنه لا يرتاح مع الحدود دي فيغادر بهدوء، أو يقصر علاقته بيك، أو يكمل معاك مُتبع “حدودك”.

الكلام دا “بشكل ما” كنت فهماه، مش بشكل دقيق زي ما كتبته كدا دلوقتي، بس كنت واصلة لأجزاء منه، علشان كدا بحب دايما أسمع كتير عن نقاط معينة علشان بتتعمق فيا بشكل أكبر وتبدأ تستقر وتبقى منك مش كيان دخيل أنت بتتكلم عنه بدون وعي حقيقي ليه.

أنا سأعترف إن كلام “آية” يومها ضايقني، بل زعلت جدا جدا، وكنت منفعلة وحاولت تمالك أعصابي… ضايقني علشان أتصدمت فيا… أتصدمت إني وقعت في فخ إني المفروض بتفهم اللى أدامي في كل اللى بيحصل معاه بس الحقيقة فيه حاجات أنا كنت بعملها بدون وعي صحيح ليها.

أتضايقت لأن “جزء “من سبب إنفصالي عن “صديق عِشرة عمري” كان من ضمنها أنه وضع حدود وأنا أتخانقت معاه أنه إزاي تعمل دا، وأنه أنت مش عارفني كويس بعد كل السنين دي وبتاع .. كنت وقتها مصدومة وحاسة بالإهانة أنه إزاي تقولي أعمل إيه ومعملش إيه بعد السنين دي كلها.. مش تكبر والله بقدر أنه…..مممم أنه كنت متخيلة أن دا بيحصل في بدايات العلاقات بس، أنه أنا معرفكش وأنت متعرفنيش فنقول لبعض دا يفرحني ودا يزعلني.. بس بعد العِشرة الطويلة أوي أوي دي خلاص إحنا حفظنا بعض، فاللي هوه بتتكلم في إيه؟ ما أنت عارفني يا جدع إني عفوية وصادقة وفعليا بتصرف بـ حسن نية وطيبة…

كنت حاسة بالخنقة أنه هقعد أتعامل بالواحدة والملي زي ما بتعامل مع الأغراب وهوه عمره ما كان غريب، دا كان قريب أوي كمان.

فكل دا دار في دماغي لما سمعت “آية” بتتكلم، وسألتها بشكل صريح أن لما فلان طلب كذا أنا عملت كذا علشان أتأكد إني فهمت اللى عملته، وكنت عايزة فعلا أعيط من الصدمة، كإن حد صفعني صفعة محترمة على وشي.

بس ممتنة ليا إني حضرت الورشة دي، وممتنة لـ“آية” إنها سمعتني وأتكلمت عن حاجة مهمة وإنها بتغذي وعيي بيها …

وكان أول تطبيق إني بدأت أستوعب وأخلي المبدأ دا من كياني مش مجرد حاجة سطحية، إني أكتب لصديقي دا عن الجزء اللى أتعلمته، أخبرته بحقه الكامل في عمل حدود، وأنه كان ممكن أتفهمه بشكل أفضل أو أرحل بهدوء.

لازم أعترف بدا، وأفضل أفكر نفسي بيه، إني زي ما بطلب أن الناس تراعي حدودي، أنا كمان لازم أتعلم أني أستجيب للآخرين وأتقبل حدودهم الخاصة.

لسه بتعلم عنها علشان أقدر أميز حاجات كتيرة وأحمي نفسي من الشر.