في 2022 وتحديدًا في 29 مايو كانت انطلاقة برنامج تأهيلي للمُطلقات المُعيلات تابع للمبادرة النسوية “سوبروومن” في مصر… اسمه ” نجاة Nagat “.🥰

انطلاقه بعد مطحنة تجهيز الشكل اللي هيمشي بيه البرنامج، هيتم نشر إيه، والصياغة وكل حاجة…

كان أول مرة أجدني في منصب “مدير برامج”، أنا كنت دايمًا بشتغل من قلب قلبي من أجل القضايا والناس بدون مسميات، بدون مقابل، ومكنتش بشغل نفسي في التفكير عن أخرت الموضوع إيه، ويمكن دا خلاني بالنسبة لسوق العمل مجرد “شخص عنده هواية” .. مش حد بيشتغل وشاطر وعنده خبره ومجتهد.

بشكل ما يُنظر للعمل التطوعي – في بلداننا – على أنه “إضافة” ليومك، حاجة مش مهمة، ومش شغلانة حقيقية، بتتعمل في أوقات الفراغ أو علشان بعض الجامعات بتطلب خبرة تطوع لإكمال التخرج.

بالنسبة ليّ العمل التطوعي هو “عمل”… لذا كنت أعطيه من كل قوتي كعادتي في عمل أي شيء.

الساخر والغريب والمُفاجئ إني مكنتش على خطة البرنامج كمدير خالص .. بل كنت وقتها مدير قسم السينما في سوبروومن، وكنت من ضمن متطوعيها.

ولكن تشاء الأقدار أن يحدث خلل في التنظيم بسبب غياب بعض الإداريين، فبدون كلام كتير وتفاصيل .. تطلب “مؤسِسة المبادرة” مساعدتي، فكنت بساعد بحب وإيمان، وكمان خبرة كبير في الإدارة والتنظيم..

فلقيت نفسي واحدة واحدة بستلم مهام جديدة وبقى ليها اسم مختلف .. ولقيتني بقدرة قادر بتنقّل من إدارة قسم السينما للبرامج.

أتذكر كيف اخترت slogan\شعار الحملة .. “لسّه في حياتك نجاة” .. حرفيًا جيه في دماغي في لحظتها.

لأن من اللحظة الأولى شعرت أن البرنامج يُخاطبني .. لذا كنت في كل كلمة اكتبها عن البرنامج، وفي تدريبي لفريق العمل، ومتابعتي للمتطوعات ..الخ كلها كانت محاولة أن أجعل كل من تتعامل مع البرنامج من قريب أو بعيد تشعر إنها متشافة، محسوس بيها، بنطبطب على روحها، بنقولها إنك مش منتهية الصلاحية زي ما مجتمعك بيقولك، إن لك حق العيش والتكملة، وأنك بطلة .. وأننا هنكمل الطريق رغم كل هذا الغم والصعوبات .. أنه “ستكون هناك طريقة للنجاة”.

وأن تلك النجاة لن تأتي بمعجزة، ولكنها من منبع حياتك ذاته.

وفي كل مرة تصل تلك الرسالة للمشارِكات كنت أشعر بالامتنان للحياة التي جمعتنا سويًا ..

فأنا أيضًا أحاول النجاة بحياتي، فرغم إصابة العصب يدي وقتها، والعذابات والآلام التي كانت ممكن تُقعد غيري، كنت أقف من أجل التكملة .. للاستمرار .. لنجاح هذا البرنامج.

والحمدلله نجحنا وتخرّجت أول دفعة من النساء الرائعات 🥰🌸

كان نفسي أحضر حفل تخرجهنّ قبل ما أمشي من “سوبروومن” .. كنت عايزة أحضن كل المُشارِكات وأقولهم قد إيه أنا فخورة بيهم .. وأنهم نعمة من ربنا .. وأني ممتنة للقدر اللي تماسّ زمان مع “آية منير” ومنها أتعرف على “سوبروومن” وأعيش معاهم 8 سنين هي عُمر المبادرة .. وأننا نعمل شغل حلو سوا ..

ولكنه نصيب .. سأظل أذكركنّ يا بطلات 🌟💪

#أمنية_تحكي

#نجاة

#تمكين_اقتصادي_للمرأة

#سوبروومن

#لسه_في_حياتك_نجاة

#Nagat

#Superwomen