الزهق من الأصناف المحدودة هنا في مصر، وخاصة بسبب المواسم وظهور أنواع معينة من الفاكهة والخضار وإختفاء الآخر، وقرفي من المُجمدات .. كانت بيئة مناسبة لظهور هكذا وجبة 😀 .. الصورة بالأعلى هي صورة حقيقية لعمايلي الهايلة (إيموشن كول)

المكونات: ( تختلف الكميات حسب الرغبة)

5 حبات بطاطس صغيرة، مُقطعة لشرائح مدورة لا غليظة ولا رفيعة

3 أنصاف من فلفل رومي ألوان (أخضر+ أصفر+ أحمر)، مقطعين لشرائح طولية رفيعة.

حزمة واحدة من خضرة المحشي المشهورة (بقدونس+كزبرة خضراء+شبت) تخلصوا من العيدان واحتفظوا بالورق الأخضر فقط.

1 حبة طماطم

1 بصلة متوسطة

3 فصوص ثوم

معلقة صلصة

توابل

صحن مشروم طازة يُقطع شرائح (كونه غير متوفر بسهولة فقررت أحتفظ بيه مُجمد، وذلك بعد مسحه بفوطة مبلولة لأن من الخطأ غسله بالماء، ثم تقطيعه لشرائح أو قطع صغير، ثم وضعه في طاسة مع القليل من الماء كمساعدة في التسوية وميلزقش في الطاسة وهو بدلاً من الزيت أو المادة الدهنية، إضافة القليل من الفلفل الأسود وبودة بصل وبودة ثوم، وأي بهار تفضلوه، يُقلب على النار لدقائق حتى يتغير لونه للأغمق، وبهذا يُصبح جاهزًا، اتركوه ليبرد ثم قوموا بوضعه في أكياس الثلاجة وكتابة التاريخ على الكيس.. واحفظوه في الفليزر))

طريقة العمل:

أفرشوا شرايح البطاطس بالصينية، فقط أتركوا القليل منها بالآخر، ثم ضيفوا شرايح المشروم، وبعدها شرايح الفلفل الرومي ..ثم المتبقي من شرائح البطاطس ..

بعدها ضيفوا صلصة الطماطم (حبة الطماطم، حبة البصل، الثوم، معلقة صلصة، خضرة المحشي، فلفل أسود، باربيكا، شطة، كمون، زنجبيل، ثوم مطحون مع شوية ميه لتحرك الخليط علشان يساعد الحاجات تطحن سوا)

ثم أضفت صلصة البشاميل (دقيق على النار هادئة مع التقليب المستمر حتى يتغير لونه للذهبي، نُضيف الحليب “نباتي أو بقري” على حسب تفضيلكم، ثم بعض التوابل زي الفلفل الأسود ونقلبهم سوا لحد ما يبقوا سائل متماسك)

ثم أضفت جبنة موتزاريلا وشيدر مبشورين.. وحطيتهم بالفرن على نار عالية – تقريبا 200 درجة –  لربع ساعة وبعدها تهدئة النار لـ – 130 درجة تقريبًا- وتركهم حتى يتحول السطح الصينية للون البني قليلا، يعني السطح استوى ..

اغرسوا شوكة في أي مكان في الصينية للتأكد أنها تصل للقاع بدون ما يعترض طريقها شيء من المحتويات، ودا بيعني إن الطبخة أصبحت جاهزة للأكل.

ملحوظات جانبية:

الأكل بالنسبة ليا كله بدون ملح، بدون زيت لإني بحاول أتبع نظام غذائي Plant Based Diet  للصحة العامة، ولكن لا يمنع انكم تستخدموا الحاجات دي زي ما تحبوا.

الحليب: أنا حاليا لا أفضل الحليب البقري، لأن معدتي مش بتتقبله، وبستخدم معظم الوقت حليب جوز الهند مع التوابل مش بيكون مسكر الطعم بالعكس .. هو فقط بيكون دسم شوية، فبستخدم القليل منه مش كل العلبة.

بالنسبة للأجبان: فيه أجبان نباتية، مصنوعة من المكسرات أو الصويا، ممكن تستخدموها لو زي حالاتي مش بترتاحوا للجبن البقري.

الدقيق: بستخدم حاليا دقيق أبيض للأسف، لأني مش عارفة الاقي دقيق أسمر.

صوص البشاميل: ليه طريقة تانية غير تحمير الدقيق، وهي طريقة سهلة للغاية بستخدمها معظم الوقت، وهي عبارة عن غلي الحليب وبعدين اصب عليه الدقيق وأقعد أحرك المحتوى للوصول للقوام المطلوب.

أخيرا: فيه ناس بتختار لحشو البطاطس خيارات تانية زي الزيتون، ودا بيعطي الأكلة ملح من مصدر تاني .. زي ما عملته في الوصفة دي .. شوفوها من هنـــا.