ما شاءالله صفحة Plant Based Diet Egypt على الفيسبوك غنية بوصفات جديدة ومتنوّعة للأكل، شعور مميز إن هناك دائما أفكار للأكل مش زي ما إحنا متخيّلين، وخاصة لما دماغنا بتقفل بالضبة والمفتاح ونفسنا مسدودة بجري أدور على وصفة هناك سواء في البوست المثبت أو تجربة لايف من أصحابها مُدعّمة بالصور.

قررت أدخل المطبخ وأجرّب .. وخاصة إني مليش في المطبخ لذا فالموضوع بيطلع طعمه أو شكله مش زي ما الناس بتعملها خاااالص 😀

وخاصة إن ساعات الوصفات بتتقال بإختصار ودا صعب علينا نحن أصحاب العلاقات العكسية مع المطبخ .. لذا هشرح الطريقة زي ما عملتها واللى بكتشفه مع نفسي وممكن تكون بديهيات عند الناس اللى معتادة على المطبخ .. بس احنا متفقين إني بشرحها لأمثالي اللى حبوا يخوضوا التحدى دا 😉

كفتة العدس بالشوفان:

الوصفة الأصلية كانت معتمدة على العدس بجبة (العدس الحبة السودا) .. ولكن أنا قررت إني أجربها بعدس أصفر ..

كباية واحدة من العدس الأصفر، غسلتها مرتين تلاتة بالميه .. وبعدين في حلّة وضعت ميه جديدة بحيث غطت العدس .. ووضعتها على النار لحد ما استوى (بعرف انه استوى لما اضغط على حبة منهم القيها اتهرست بسهولة)

قشّرت حبتين بطاطس متوسطين الحجم .. وقطعتهم 4 ارباع ووضعتهم في حلة ثم وضعت ميه غطتهم وسبتهم يتسلقوا شوية (بعرف انها استوت لما اضغط عليها بشوكة ضغطة بسيطة فتتهرس بسهولة معايا).

فرمت بصلة متوسطة الحجم .. وبعدين جبت عجانة/قطاعة البصل/الكِبة (المهم حاجة تطحن يعني ) وحطيت فيها العدس المستوي + البطاطس المستوية + البصلة المبشورة + ثوم مهروس +  توابل (انا وضعت فلفل اسود، كزبرة ناشفة، شطة مطحونة صغننة، زنجبيل مطحون صغنن، معلقة صغيرة اوي من الملح كخطوة لتقليل الملح من الأكل كله + معلقة شوفان + أي توابل عايزينها تاني لكن كان في ملاحظة قرأتها ولم أجرّبها، إنه  لو تم وضع كمّون ضمن الخليط احتمال كبير تعطي لنا مذاق الفلافل ).

طحنتهم مع بعض كلهم لحد ما تأكدت أنها بقت عجينة وكل المحتويات تداخلت مع بعض …

نصيحة حطوا العجينة في صحن ودخلوها التلاجة شوية علشان المكونات تبقى سهلة التشكّل .. لإني جربت أشكلها على أشكال زي الكفتة أو الفلافل والمكونات سخنة فكان الموضوع صعب وبتلزق في ايدي وعذبتني ….

لما المكونات تبرد بالتلاجة .. تطلع ونبدأ نشكلها على الاشكال اللى نحبها .. انا عملت اشكال مختلفة في المرة الواحدة علشان تنوّع وكمان أعرف مين كانت هتستوي بشكل أفضل ..

لما تشكلها بإيدك عندك حل إنك تسويها زي ما هيه .. أو تمررها على شوية شوفان علشان تاخد تحميص من الوجهين …

ممكن تبدل الشوفان ببقسماط (جبت بقسماط من المخبز وطحنته بنفسي أو اشتروا المطحون جاهز) ..

جبت صنية تيفال وحطيت ورق زبدة علشان اضمن ان المحتويات مش هتلزق لإني مش هحط زيوت .. ورصيت عليها الكفتة وحطتها بالفرن قعدت تقريبا ساعة الا ربع علشان تتحمر .. وطبعا كنت بكشف عليها علشان اقلبها على الوجه التاني للتأكد ان الوجهين متحمّصين.

ممكن متستخدموش فرن في التسوية .. ممكن صينية تيفال بدون زيوت وبرده نرص الكفتة ونضعها على نار هادية ونتأكد ان الوجهين اتحمّروا زي ما شرحت فوق.

مكرونة بالخضار والبشاميل

سلقت كيس مكرونة أقلام (ممكن تختاروا النوع اللى تحبوه ) … بوضع ميه لنصف الحلة تقريبا وعلى النار لحد الغليان ثم وضعت المكرونة بدون اضافات لحد ما استوت (اضغطوا على واحدة مكرونة لو اتهرست بسهولة يبقى استوت).

في طاسة تيفال، و ضعت بصل مبشور ثم ثوم مطحون مع التقليب لحد الاصفرار .. وضعت توابل بسيطة (فلفل اسود، ملح بسيط+شطة بسيط+ 2 حبة حبهان)

ثم وضعت كيس خضار مشكل مجمد .. قلبت المحتويات جيدا على نار عالية لمدة دقيقة تقريبا .. لان الخضار هيعتمد على الميه الخارجة منه .. عندما اختفت المياه اضفت كوب ماء وتركتهم يغلوا مرتين على نار عالية .. ثم خفضت النار تماما وتركتهم حتى تشرّب الماء تماما وبهذا الخضار اصبح مستوي.

جبت الصينية التيفال .. وضعت رشة دقيق صغيرة بالأرضية لحماية المحتوى من الالتصاق بالصينية .. ثم وضعت طبقة من المكرونة المسلوقة وفوقها وضعت الخضار الجاهز ثم بعض المكرونة المتبقية ثم وضعت صلصة البيشاميل (سخنت كوب ونصف حليب ثم وضعت كوب دقيق واغلقت النار وقمت بالتقليب المستمر لكي يتحول إلى خليط سائل ثم وضعت بعض التوابل زي الفلفل الاسود والشطة) .. ثم وضعت بالنهاية جبنة موتزاريلا (ممكن الاستغناء عن الجبن تماما لو حابين أو وضع نوع تاني من الجبن)

وضعتهم في الفرن لمدة ساعة الا ربع على نار معقولة .. تقريبا 160 درجة وبهذا تحمّر الوجه واصبحت جاهزة للأكل.

ملحوظة عامة: نظام الفيجن لا يعتمد على المُجمدات ولا منتجات الالبان ولا المواد المحفوظة والمُعلبات، ولا ملح ولا سكر وبالتأكيد لا زيوت أو مواد دهنية .. وأنا تقريبا كنت كدا لحد ما نزلت مصر، واضطريت آسفة أني استخدم الحاجات دي على أضيق نطاق لإن معنديش بدائل حاليًا .. ولكن ان شاءالله هلاقي مكان فيها خضراوات خالية من المبيد الحشري وسليمة من جوه، وأكون توقفت عن الملح تماما.. يا مسهل.