بقالي قرن عايزة أحط البوست دا، أصلها حاجة مميزة جدا بعائلتنا يعني .. احنا عيلة البشاميل سعادتك

لما حد يسافر ياخد معاه شوية مكرونة بشاميل في علبة، وهو راجع بيتهم لازمن ولابد يلاقي مكرونة بشاميل محترمة تستقبله …

أنا اتعودت على البشاميل من يد ماما، مميزة جدا في عمله وليه طعمه الخاص بيها، ومن الصعب تقنعني أكل مكرونة بشاميل عند أي بشري بعد كدا .. بعيدا عن أن الطعم بيكون مختلف عن المتعودة عليه ..ولكن محدش بيقدر يسوي اللحمة المفرومة كويس ويخلي طعمها ابن ناس قد ماما.

عادة الناس بتعملها دسمة أوي، ومش مستوية تماما ودا شيئ مرهق ليا جدا، أنا كنت من زمان مستحيل آكل أي لحمة أو بروتين عموما الا لو كان مستوي well done  ..

نتكلم شوية عن طقوسنا مع هذا الشأن العظيم

اللحمة المفرومة: علشان نبقى متفقين مع بعض، أحنا عاملين شروط صارمة في هذا الشأن .. اللحمة المفرومة لازمن تكون بقري، مفرومة كويس، وأخيرا لازم تكون خالية تماما من أي دهون .. أي مخالفة في أي بند مش هتتعمل .. ومش هتتاكل .. قشطة كدا 😀

نيجي لطريقة العمل بقى: 

وضع اللحمة المفرومة في طبق عميق مع بصلات مفرومة، تقريبا 7 بصلات حجم كبير إلى متوسط للنصف كيلو … فيه علاقة طردية هنا، كل ما نزود اللحمة يزيد البصل.

رشة فلفل اسود، ورشة شطة، ولا تضع الملح دلوقتي لانه هيقعد فترة وهيحول الاكل لسبخة مليانة ملح..  نسيبهم كلهم مع بعض شوية تتعصج أو تعيش مع نفسها، ولضمان أن طعمها يكون مُبهر وكويس.

ثم نأتي بحلة متوسطة نضع فيها معلقة زيت، ثم بصلة صغيرة مفرومة، ونقلبهم على النار لحد ما يتحول البصل للون الأصفر.

ثم نضع محتويات الطبق (اللحمة المفرومة مع البصل) في الحلة، ثم نضع البهارات المعتادة، معلقة ملح، معلقة فلفل اسود، نصف معلقة شطة، رشة زنجبيل.

ونقلبهم جيدا ونتركهم على النار هادية مُعتمدين على الميه الموجودة من المكونات بالفعل..

بعد 10 دقايق من التقليب والمتابعة للتأكد ان الميه اللي جواها بدأت تختفي وتنشف، وقتها نضع نصف كباية ميه ثم نقلب من جديد ونتركها على نار هادية وهكذا حتى مرور 45 دقيقة..  خلالهم بيتم التقليب ومتابعة الميه بحيث برده لا تجف تماما أو المحتويات تلتصق بالحلة… طبعا بعد كل الميه دي كلها هنبقى محتاجين نحط ملح شوية وفلفل علشان نعادل الطعم.

من الاخر لازم اللحمة تصبح لونها بني/رمادي غامق well done مش احمر علشان بنتقرف..

كدا اللحمة أصبحت جاهزة، يبقى نيجي للجزء الخاص بيا (ايموشن كول آخر حاجة)

أحنا معتادين على عمل صينية مكرونة بشاميل، وصينية كوسة بشاميل .. ساعات بتختم على صنف واحد بس في المناسبات اللى بنبقى مش طايقين فيها نفسنا وعايزين نخلص.

في بعض المناسبات لما ماما بتقرر هي اللى تعملها، بيطلع حاجات جديدة زي:

باذنجان بالبشاميل (باذنجان مقلي وفي النص لحمة مفرومة ومتغطي كل دا بالبشاميل …

أو بطاطس بوريه – اللى هي بطاطس مهروسة وفي النص لحمة مفرومة ووجه الصينية بيتحمر بالجبن اللى عليه.

أو مكرونة اسباجيتي بالصلصة والبشاميل ( يعني مكرونة عادية بالصلصة بس هنحط في وسطها لحمة مفرومة ومن الوش طبقات الجبن زي الموتزاريلا والرومي وكدهون

أو بقية رز على حاجة تانية وتتقفل بالبشاميل .. ما شاءالله الست دي كتير بتدخل المطبخ ونص الطلبات مش موجودة اصلا، أو حاجات موجودة غلط زي دقيق حلويات مش دقيق عادي، ولو حد تاني كان مكانها كان طلع يرقع بالصوت ويقول مش لاعب .. بس هي بتعرف تتصرف وبطلع الحاجة حلوة.

هكلمكم على الكوسة في الأول:

عادة فيه ناس بتكره الكوسة لإنها لزجة زي القلقاس وكدهون .. بس أقدر أقولكم أن معظم اللى بيكرهوا الكوسة عموما قدروا ياكلوا الكوسة البشاميل بتاعتنا وعجبتهم .. فجربوها فعلا هتعجبكم.

نجيب كيلو ونص كوسة متوسطة – تكفي لصينية متوسطة إلى صغيرة –

بعد غسلها، تُقطع شرايح معتدلة – الكوسة مش الصينية – لا شرايح رفيعة ولا سميكة..

نأتي بحلة تكفي ونضع فيها القليل من الماء، كوب تقريبا، نتركها تغلي ثم نضع فيها الكوسة، نضع نصف معلقة ملح ومعلقة فلفل اسود

ثم نتركها على نار هادية ونغطيها ونتركها تنضج على بخار الماء، مع تقليب رقيق لا يهرسها لانها هشة..  حتى نراها قد استوت تماما، لينة شبه مهروسة… وبهذا نرفعها من على النار فهي جاهزة للإستخدام الآن.

بالنسبة للمكرونة أعزائي القراء:

وضع ثلاث ارباع الحلة الكبيرة مياه لتغلي، وبعد الغليان نضع معلقتين كبار ملح..  لان الملح قبل غليان الميه بيأخر الغليان..

وبعدها يتم وضع المكرونة القلم / مشطوفة، تقريبا كيسين وتترك حتى تستوي تماما..  ليس نفس درجة تسوية المكرونة بالصلصة بل اكثر.

بعدها تُصفى المكرونة من المياه بإستخدام المصفاة، وتشطف بالماء البارد من الصنبور لنتأكد انها خالية من النشا … ( أقدر أقولكم أن كل ما كانت المكرونة ماركة فخيمة، كل ما كان ماء السلق شفاف .. أما تحول الماء لشيئ أبيض لزج فدا النشا اللى طالع من الأخت المكرونة المُبجلة اللى جاية من شركة كسيحة.)

كدا كل المكونات جاهزة لدمجها ….

هتكلم عن الكوسة والمكرونة مع بعض لأن الطريقة اللى جاية واحدة، متحطوش الاتنين على بعض طبعا، كل واحدة فيهم ليها صينيتها ..

نُحضر صينية كبيرة وندهنها بالقليل من الزيت بواسطة فرشة، علشان الزيت ميبقاش كتير .. نرش رشة دقيق علشان المحتويات متلزقش في الصينية من تحت.

 ونضع طبقة أولية والأكبر من المكرونة / الكوسة – اللى ناوي تعملها يعني –

بعدها نضع اللحمة مفرومة كلها، ثم نضع القليل المتبقى من المكرونة/ الكوسة ثم نضع صوص البشاميل

(طريقتي العجيبة علشان اقلل الزيوت، اغلى محتويات علبة حليب قليل الدسم في حلة صغيرة، ثم اطفئ النار، ثم أضع فوقها كوب دقيق على الحليب المغلي بالاضافة لمعلقة صغيرة ملح ومعلقة فلفل والقليل من الشطة، أقلب بسرعة الخليط بواسطة مضرب البيض اليدوي، ولو كان الخليط بحاجة لأن يكون متماسك أقوم بزيادة بعض الدقيق .. قد اضيف معلقة صغيرة زيت وقد لا أفعل .. على حسب الموقف)

بعد وضع الصوص نضع الجبن الرومي المبشور، موتزاريلا قليلة الدسم .. ثم نضعها في الفرن على درجة حرارة عالية لمدة من 5 دقايق، بعدها نخلي النار هادية لمدة 45 دقيقة وبكدا تبقى جاهزة وصحتين.