::Photo credit goes to its owner::

فطار يوم الجمعة .. يوم الجمعة كله ليه طقوس لوحده كدا عادة مش بتتواجد في بيوت كتيرة، لما نزلت مصر أتصدمت يعني إنه ايييييييييييييييييييييه دا .. هو مش كلنا بنعمل دا 😀

لإن يوم الجمعة فيه صلاة الجمعة – ياختي عليا وأنا بقول حِكم – لذا سيدي القارئ إحنا مش بنفطر قبلها بل بعدها .. لذا هو فطار متأخر وفي مكانة الغدا كدا…

كلنا بنكون واقعين من الجوع وعايزين نعمل حاجات متنوعة مش بنعملها طول الأسبوع.

بابا هو بقى اللى بيتولى دائما وابدا فطار يوم الجمعة، ومش بيسمح لحد يتعدى على خصوصياته في هذا الشأن يعني ..

لذا هي اختراعات بابا الحقيقة.

اولا: البيض المقلي الأومليت بأنواعه.

ليه كذا طريقة .. على حسب المود

ممكن بيض مقلي باللانشون أو البسطرما .. ودي بتحمر اللانشون المُقطع لمكعبات تخينة / شرايح البسطرما في الزيت وبعدين تحط البيض المخفوق جيدا مع ملحه وفلفله الإسود.

ممكن بيض بالطماطم .. الطماطم بتتحمر في السريع أوي مع الزيت .. متطولوش عليها لإنها بتموت بسرعة .. وعليها يتحط البيض المخفوق برده مع ملحه وفلفله الإسود.

ممكن بيض بالانشون والطماطم .. يتحمر اللانشون الأول وبعدين ننزل بالطماطم وبعدين بالبيض المخفوق مع ملحه وفلفله الإسود .. من الآخر إحنا مش بناكل البيض غير أومليت الصراحة

أو بيض بالبصل والفلفل الأخضر.. بصلك مع زيتك يتحمروا .. تنزل بعدها بالفلفل الاخضر المقطع قطع صغننة خالص (ممكن تختاروا فلفل اخضر حامي أو رومي) ثم البيض اللى خلاص حفظناه بقى بفلفله الإسود والملح 😀

أو بيض بالجبنة .. إختاروا نوع جبنة حادق علشان بيعطي مذاق للأكل .. بتتحرك مع الزيت السخن شوية وبعدها بنزل البيض.

ثانيا: الجبنة بطماطم

جبنة اسطنبولي بتتحط في طبق عميق / غويط  وبعدين فوقها زبادي يخفف حدة الملوحة اللى هتموتنا دي .. وبعدها قطع طماطم مكعبات .. تقليب للفيلم دا كله .. واخيرا زيت زيتون على الوش.

رابعا: الفول بالسلطة

بيفتح علبه الفول لإننا بنستخدم فول مُعلب كما هو واضح .. يسخنه وبعدين يحطه في طبق عميق ويضيف عليه خيار وطماطم وخس مقطعين صغير ويحط البهارات بتاعته ..

اللى هي المفروض ملح وفلفل وكمون وزيت زيتون على الوش .. بس لسبب ما مهما حاولت أعمله بيطلع طعمه قاتل على عكس بابا لما بيعمله بيطلع حلو أوي… في حاجة مش مفهومة في الموضوع دا الصراحة.

من كل ما سبق إحنا بناخد 3 أصناف فقط .. مع إعتبار إن الفول والجبنة بطماطم ثابتين ، فبنختار بين البطاطس بالكمون أو أي نوع بيض أو ساعات بنجيب فلافل .. وساعات بنكتفى بهذا القدر وبلاش صنف تالت أصلا.