::Photo credit goes to its owner::

لما أختي أصيبت بمغص مرارة، وكان لازم تاكل مسلوق وحاجة مغذية وانا لوحدي ومش هعرف أعمل لها شربة،  كوني عندي مأساة في التعامل مع البروتينات .. بحس بقرف جدا.

بل لما بتتعمل في البيت انا بضطر اخرج خالص أروح أي مكان لحد ما يخلصوا .. أو أتحبس في غرفتي ومعايا بخور وعطور للقضاء على الريحة اللى هي اصلا محدش بيشمها زيي نظرا إني بشتغل “كلب هول” بعد الضهر :/

فبعد العياط على إن حبيبتي الصغننة عيانة وانا رأس كُرنبة في البيت مش عارفة أعملها حاجة تاكلها،  وخاصة إني كنت دايما بسمع إنه أي شُربة لازم تتعمل ببروتين علشان تبقى شربة اصلا .. يعني تحط لحمة او دجاج أو اي حاجة بقى .. بل في ناس ساعات بتحط مرقة طعام.

فأنا مش عندي أي حاجة من الحاجات دي .. وحاولت اضغط على نفسي إني أفتح الفليزر اجيب لحمة من جوه، ولكن مكنتش قادرة نفسيا وكنت مشمئزة جدا وكان الموضوع فوق طاقتي.

لذا ظهرت من العدم “شربة الخضار بدون أي بروتينات 😀

قطعت بصل شرايح ووضعته في حلة  .. قطعت بطاطس مكعبات وحطيتها كمان وخلتهم على النار شوية صغننة .. بعدين حطيت كيس خضار مشكل مُجمد … ملح وفلفل وشوية زنجبيل لا يروا بالعين المجردة وخليتهم يعيشوا لحظات مع نفسهم بدون زيت .. وبعدين حطيت ميه غطتهم، وبعدين غطيتهم بغطا الحلة وسبتهم…

بشكل ما حصلت على خضار لطيف وطعمه حلو اوي والميه بتاعتها كمان حلوة .. فضلت أعملها لأختي لحد ما بقت تمام وكنت فرحانة اوي إني خلتها تاكل (^0^)