::Photo credit goes to its owner::

كلنا كتير .. نحلي بقى 😀

من صغري وأنا فجأة بيطق في دماغي إنه عايزة كريم كراميل أو جيلي دلوقتي … فإكتشفت إنها مش صعبة خالص والله.

الأول بشتري علبة كريم كراميل وعلبة جيلي فراولة من السوبر ماركت 😀

نبدأ بالجيلي ..

حلة وفيها أصب 2 كباية ميه أو 3 بالكتير واسيبها تغلي .. وعليها افرغ كيس الجيلي كله .. اقلب بمعلقة الحلويات.

ايون احنا عندنا معلقة خشب للحلويات مش بنستخدمها غير في كدا علشان متخدش ريحة الأكل .. لإنه حتى لو اتغسلت بتكون – لأصحاب حاسة الشم العالية أمثالي – لسه فيها ريحة أكل ودا مش لطيف خالص.

تقليب الخليط مرتين تلاثة على النار، وبعدين اسيبه يهدى شوية وبعدها اصبه في فناجيل الشاي أو اطباق زي بتاعة الشربة بس صغيرة،  واسيبه في التلاجة ساعات كتيرة لحد ما القوام يبقى متماسك.

في الكريم كراميل بقى:

 أغلي اللبن في حلة وبعدين تصب عليه البودرة الصفرا اللى هي بتاعة الكاسترد ، نقلبهم مع بعض بس النار تكون مطفية …

أجري بسرعة أجيب فناجيل شاي وأصب فيهم الكراميل اللى بيكون في كيس منفصل في نفس العلبة .. وبعدها أصب القوام اللى كان في الحلة .. وأسيبه في التلاجة برده لحد ما يشد حيله.

واعتقد مفيش أسهل من كدا 😛