::Photo credit goes to its owner::

نأتي لمعشوقة الجماهير .. البطااااااااااااااااااااااااطس (تصفيق حاااار)

عائلتنا أصلا ليها جذور تاريخية مع البطاطس ، تقريبا كانوا أقرباء من الدرجة الأولى .. في أي وجبة وفي أي يوم وفي أي مناسبة هي الحاضرة بقوة وثبات لا يتزعزع.

لذا إحنا عندنا كذا وصفة ليها … الموضوع كبييييييييييييير كبير يعني 😀

أولا:سندويتش البطاطس بالبيض:

دي أختراع من بابا

بتنفع الوجبة دي عشا وتمشي فطار بس يكون متأخر …

المكونات:

– بطاطس

– زيت للقلي.

– بيض (تقريبا 4 بيضات علشان تبقى وجبة للكل)

– توابل (ملح، فلفل).

طريقة العمل:

تقطع البطاطس شرايح رفيعة وتتقلى .. وهي بتصفي من الزيت بقى نقوم نعمل بيض أومليت مقلي ..

بيفرش البطاطس في الطبق بحيث تبقى طبقة ، وبعدين ينزل عليها قرص البيض بس ينزله على شكل قرص مش يتعجن أو يتعوج في حته ..

وبعدين نغطيه بطبقة بطاطس مقلية تاني، بحيث يكون البيض المقلي وسط طبقات البطاطس زي السندويتش …

يحط ملح وفلفل على الوش ويقطع السندويتش دا أربع أرباع .. كل ربع ماشاءالله يعني بيكون وجبة مشبعه للفرد .. فلطيف وفكرة جديدة لجمع البيض مع البطاطس

ثانيا بقى: دي وصفة من إختراعي.

لإنه عايزة أكل بطاطس بس مليش في موال بطاطس في الفرن لإن عائلتنا عادة بتعملها باللحمة يعني مش تخصصي خالص … وبرده مش عايزة أكلها مقلية، كنوع من التجديد علشان الزهق.. ظهر هذا الإختراع.

“بطاطس بالبسطرما“

المكونات:

– بطاطس

– زيت زيتون

– بسطرما

– توابل متنوعة

طريقة العمل:

بطاطس ونقطعها مكعبات ماشي ، صوابع تخينة مش هتقول لاء .. المهم

 بجيب الحلة وأحط زيت على النار يسخن وبضع البسطرما وأقلبهم لحد ما تتحمر،

بعدها انزل عليهم بالبطاطس المقطعة وأحط ملح وفلفل وشوية شطة وشوية كمون وذرات جنزبيل وشوية كاري .. من الأخر البهارات اللى في وشي بحطها .. وكل مرة بحط حاجة جديدة.

 أقعد أقلب فيهم شوية مع بعض معتمدة على الميه اللى هتطلع من البطاطس طبيعي .. مجرد دقايق بس مش اكتر وبعدها احط كباية مية عليهم .. ساعات بحط كوبايتين أو اكتر شوية صغيرة لو البطاطس من النوع الجملي اللى بتبقى محتاجة قوة إلهية علشان تستوي ..

ملحوظة مهمة جدا خالص يعني .. البسطرما عادة بتكون ملحة جدا، فعلشان كدا بحط ذرة ملح وساعات مش بحط خالص لإن الأكلة ستعتمد في ملحها على كمية الملح الرهيبة اللى في البسطرما …

بقفل الغطا واستنا غلوة واحدة على نار قوية،  وبعدها بوطي خالص النار واسيبها تعيش .. الميه بتتسحب تماما وتبقى جاهزة للأكل ..

سندويتشات بقى .. نغمس مش هتقول لاء يعني 😀

ساعات بعملها باللحمة المفرومة مكان البسطرما،  بحيث احط حبة صغيرين من اللحمة المفرومة المستوية الجاهزة على الاكل من قبل كدا مش نيّة يعني .. في جميع الوصفات دي مجرد بنغير الحاجات اللى هتتحط مع البطاطس وهي نفسها الطريقة في كل مرة.