::Photo credit goes to its owner::

وأنا صغيرة – قبل التحول لنباتية – إخترعت وصفة في السريع كدا علشان الغدا وهي “لانشون بالطماطم”

المكونات:

– لانشون قطعة كبيرة ونقطعها إحنا بالشكل اللي عايزينه.

هنا – بالإمارات-  اللانشون بيكون في علب معدن وعلى شكل قالب ..إما قالب مدور أو مستطيل .. فبجيب علبة متوسطة الحجم ..

– زيت زيتون

– طماطم

– توابل (ملح، فلفل، القليل من الشطة حسب الرغبة)

طريقة الطهي:

بقوم بتقطيع اللانشون مكعبات تخينة .. وأقطع طماطم مكعبات كمان

اجيب حلة صغننة ولطيفة .. احط الزيت يسخن وعليه احط اللانشون قبل الطماطم لإن في هذا حكمة،  تسألوني ايه؟ 😀

أقولكم إن الطماطم بتتفعص بسرعة وتدوب وأنا عايزة كمان أحمّر اللانشون لإن عائلتنا لا تأكله إلا بعد تحميره على النار .. ومهما كانت المُغريات والكسل أو الإستعجال اللى ادامنا فنحن لن نتزعزع عن أكله متشوح على النار ..ففي النهاية دي لحمة يعني ومش بتخيل تتاكل كدا على طول (ايموشن بيغمن عليه)

اتحمرت قطع اللانشون مع الزيت .. ننزل عليها بالطماطم .. ملحك وفلفك الاسود وشطتك .. سيبهم لحظات يعيشوا مع بعض كلهم مع التقليب وبعدين أضف نص كباية ميه.

إقفل الغطا وسيبهم يعيشوا مع نفسهم مع نار عالية بحيث يغلوا مرة وكل التركيبة تتجانس مع بعضها .. وبعد كدا سيبهم على نار هادية .. كبيرها 10 دقايق المهم نحافظ على الصوص اللى طالع، مش انشفها للآخر يعني .. وبكدا يبقى الطبق جاهز …

نعمل جنبه أرز أبيض ولطيف كدا ويبقى صحتين (^0^)