“طبق العدس” … ودي صورة بحق وحقيق للطبق بعد ما عملته .. أي خدمة 😀

الأكله دي مقدسة عندي وقريبة من قلبي يمكن علشان هي أكلة من فلسطين، فكفاية إنها من هناك علشان احبها بدون تفكير ..كمان بتدعم توجهاتي في كوني تحولت لنباتية قد الدنيا.

هي أكله مُشبعة جدا وفي نفس الوقت مفيش شعور بالثِقل كإنك واكل طوب.

سريعة، كبيرها ساعة لو ماشي بالتصوير البطيء … تحس إنها وجبة بنت ناس كدا ..

بنلجأ ليها كتير لما بنكون زهقانين من الأكل المُعتاد وأكل المطاعم .. وفي نفس الوقت هي وجبة فيها نسبة بروتين عظمة يعني. (علشان الناس اللى بتنهار عصبيا إنه فييييييييييييييييين البروتينات .. اعيش ازاي بدون بروتينات والكلام اللطيف دا .. فللتوضيح فوائد العدس كمصدر بروتين تعادل اللحم وغيره).

الوصفة دي علّمتهالي ماما .. اللى خدتها من جارتها الفلسطينية زماااااان وأنا مفعوصة صغيرة.

المكونات: تكفي العائلة بالكامل

– نصف كيس عدس ذو حبة سوداء “عدس بجبة” ((نص الكيس بتعمل حلة ضخمة تكفي عائلة كبيرة وياخدله يومين لحد ما يخلص ، لإنه بينفش/ يتضاعف حجمه))..

– بصلة كبيرة مفرومة

– صلصة طماطم

– زيت زيتون

– توابل (ملح، فلفل أسود، القليل من الشطة)

– القليل من الشعرية.

الوصفـة:

أضع العدس في حلة متوسطة الحجم، يمكن أصغر شوية واغسله بالماء في السريع كدا .. يمكن شطفتين بالميه وبعدين أحط ميه جديدة تغطيه واسيبه 5 دقايق كدا مع نفسه.

بعدين هرمي الميه اللى فيه، واحط ميه جديدة لحد ما اغطيه كويس وتتجاوزه كمان .. بحيث اعمل حساب غليان الماء لحد ما يستوي ..

احطه على نار عالية واسيبه يغلي كذا مرة .. تقريبا ربع ساعة، هجرب إني أخد عدساية من الحلة وأضغط عليها بصوابعي .. لو بغضطة بسيطة اتهرس في ايدي يبقى كدا استوى … انا مش بسيبه يتهري مني لإن لسه في عملية تانية هتتعمل فيه فالأفضل إنه يكون متماسك.

علشان أكسب وقت خلال تسوية العدس بجيب حلة تانية،  حلة كبيرة تناسب حجمه لما يجهز ويكبر يتضاعف.

بحط في الحلة الجديدة دي معلقة زيت زيتون وبصل مقطع واسيبهم على النار، هيصفر البصل شوية

فابدأ أضع صلصة وعليهم معلقة ملح وفلفل وشوية شطة صغننة .. واسيبهم مع بعض شوية على النار ..

العدس المستوى جاهز خلاص .. يبقى أضعه بكل بالماء المتبقي معه في الحلة الجديدة اللى فيها الصلصة والبصل …

الناس اللى القاولون بتاعها مقدم استقالته، الأفضل يصفوا منه الميه وياخدوا العدس في المصفة ويضفوه على الحلة بتاعة الصلصة.

هنزود ميه بقى .. ميه تغطيه وزيادة شوية كمان لان فيه مرحلة غليان هتحصل ..

أسيبهم على النار العالية تغلي مرة واتنين وتلاتة .. بحيث كله يبقى متجانس مع بعضه .. ساعتها أكون جبت شوية شعرية (بحجم قبضة اليد او اكتر شوية) أحمرها بدون زيت في اي طاسة (يعني أحط الشعرية في الطاسة وأقلب لحد ما اشوفها لونها بقى دهبي غامق أو مايل للبني شوية)

ساعتها هاخد الشعرية وأضيفها للحلة وهي لسه محتوياتها بتغلي على النار .. تاخد كمان غلوة واحدة علشان الشعرية تشبك في الكيان.

اقفل النار، وأحط الغطا … بستنا شوية الدنيا تهدى جوه الحلة.. يعني ممكن ربع ساعة أو بيتم تقديمه على طول مش هتفرق .. عادة أي أكل لما يقعد يهدى بيكون أحلى

طريقتنا في تناوله : بتكون إنه بيتم وضعه في طبق الشربة العميق دا … كنا زمان بنعمل جنبه بطاطس مقلية أو بيتاكل معاه علبة زبادي علشان تطفي سخنيته شوية .. وطبعا الخبز .. ساعات بنحمص الخبز شوية وساعات بناكله زي ما هوه…

بالنسبة ليا باكل العدس بطريقة ( أحط قطعة خبز صغننة في فمي وبعدها معلقة عدس) أختي بتغمسه وتخلص نفسها.. أهيه طريقة برده مش هيقول لاء.

ملحوظة: يمكن الإستغناء عن الزيت، بتقليب البصل مع القليل من الماء .. ويمكن الإستغناء عن الملح بوضع ثُماء فهي تعادل شعور الملوحة..