خبز محشو سبانخ مع بصل.

الوصفة:

2 كوب دقيق أسمر، معلقة خميرة جاهزة، وحطيت شوية توابل علشان العجينة نفسها تبقى منكهة (ثوم بودرة، باربيكا، زعتر اورجانو).. وكل مرة بختار نكهة مختلفة للعجينة..

كوب ميه دافيه واعجني بإيدك، لو بتلزق في ايدك ضيفي دقيق لحد ما تمسك في نفسها كعجينة.. ب

تحطي معلقة زيت زيتون عليها وتقفلي بسولوفان شفاف وتحطيها فمكان دافي ومفيهوش نور (حطيته بالماكروويف بدون ما اشغله مجرد حفظ مش أكتر).. خليته يخمر 90 دقيقة لإن الدقيق الأسمر بيطول شوية.

الحشو: بصلة شرايح، 2 فص ثوم مفروم، عليهم السبانخ مقطعة وتوابل (ملح، فلفل، ثوم مطحون،كزبرة مطحونة) على النار مع زيت زيتون وهتلاقيها حجمها بيقل وبتشبك مع الحاجات.. مجرد ربع ساعة مش اكتر هي جاهزة..

في الحشو حطيت صينية فيها شوية زيت.. فردت العجينة بإيدي على مقاس الصينية (مش بستخدم الخشبة بتاعة الفرد 😁) وحطيت الحشو بالنص، وعليه جبنة موزاريلا وبارميزان..

وقفلت النصين العجين على بعض وقلبته بحيث اللي تحت بقى فوق.. وعملت فتحات بالسكينة وسبتها تتعاقب في الفرن على 200 بالحرارة تقريبا نص ساعة على حسب بتحمر امتى

ودي تعليمات من صديقتي الشطورة بتعدل بعض الأخطاء:

بعد ما تشكليه وتحشيه متدخليهوش الفرن على طول، غطيه وسيبيه نص ساعة يخمر تاني قبل ما تدخليه الفرن، ده هيخليه هش أكتر ومش مكتوم ..

وأنتي بتعجني متخليش العجينة ماسكة نفسها اوي خاصة لو بدقيق أسمر، خليها بتلزق خفيف لأن ده معناه إن محتوى المية فيها أعلى بالتالي لما تدخل الفرن بخار المية اللي هيطلع منها هيبقى أكتر فهيزق العجينة لفوق ويعمل فراغات أكتر وبالتالي هتبقى خفيفة أكتر ..

#وصفات_نباتية