فيلم “عرق البلح” ليه قصة معايا 🥰

فاكرة كويس لما الفيلم أتعرض في المهرجان في مصر وسمعت إن فيه ناس سابت السينما علشان مش فاهمة الكلام، وكانوا بيقولوا إنهم محتاجين ترجمة، ودا كان لفت نظر كتير من الصحفيين بإعتبار إن الفيلم مصري وبيتكلم بلغة مصرية بين اللغة العربية وبين لهجة داخلية من صعيدنا.

لذا كان فيه رهبة من الإقتراب، وخاصة إن دايما في مصر بيخوفوك من أفلام المهرجانات، إنها أفلام مش هتتفهم مهما حاولت لإنها بتتكلم برمزيات وعندكم أهوه “يوسف شاهين” .. الخ من الكلام المُحبط دا…

بس كان بيجذبني وجود “شريهان” فيه، فكنت بقرب بحذر من خلال لقطات متفرقة طوال السنوات اللى فاتت، وأغنية “بيبا” الشهيرة، حيث الإنبهار كان متوقف على تصميم الرقصة واللحن مش أكتر من كدا.

من كام سنة روحت سيشون مع الدكتورة “سوسن عامر” وكان من ضمن شرحها لمفردات السينما والنقد أتكلمت عن فيلم “عرق البلح”.

وأنا بسمعها وبشوف اللقطات أدامي كانت دموع التأثر بالجمال في عيوني ..وفضل جوايا مشاعر كتيرة أوي ناحية الفيلم، وبقى عندي رغبة عارمة في مشاهدته كله، وفضل كلامها عنه وعن تفاصيل أغنية “بيبا” مش بنساها لحد اللحظة رغم إن ذاكرتي بقت بتوقع حاجات كتيرة أوي.

برشح لكم بشدة مراجعة عمر أبوالمجد في قناته على اليوتيوب “من عنيا” لشرح هذا الفيلم الخلاب.

لما شوفت المراجعة دي شعرت بقشعريرة من شدة جمال والتأثر بالفيلم، والأغنيات اللى فيه خلت الدموع تملا عيوني تاني .. وحسيت بطاقة هائلة من المشاعر والجمال خبطتني فألتحمت بيا، وبقيت بسبح جواها.

دي الوصلة المراجعة:

https://www.facebook.com/MnEniaOfficial/videos/556095714809520

قد إيه معجزة حقيقة لما تقدر تصيغ أفكارك ومشاعرك في قطعة فنية بديعة زي دي، جوايا رغبة حقيقة إني أقدم حاجة بالجمال دا وتعيش عمر بحاله.

بعد ما تشوفوا الفيديو بتاع “عمر”، اتفرجوا على أغنية “بيبا” لوحدها من الوصلة دي

https://youtu.be/T4dpIyv6o_k

شوية أفكار عن الأغنية:

– بنشوف شريهان بتتحرك وهي لابسة أسود زي البقية، ولكن الفرق إنها بتلبس الأسود فقط من بره وهي ملونة بلون دافي من جوه وهو البرتقالي .. ودا بيرمز إنها الشباب والحماس والأمل.

– الكاميرا بتسلم من شريهان للبنت اللى وراها ثم تسلم لعبلة كامل بشكل سلس جميل، بيورينا مشاعر السيدات دول وهما موجوعين.

– جملة “بيبا والصعيد مات، بيبا وخلف بنات” يعني افتقاد الرجال بكل صورهم زي كإنهم بقوا أيتام.

– شخصية “شفا” كان المخرج عايز يشرح إن بينها وبين الطبال في الفرقة علاقة غير شرعية فلم يقرر إنه يكون تقليدي بلقطات معروفة، فجابها وسط الأغنية بشكل لديع..

إنها بتقرب للدايرة، يتخلع الغطا بتاعها فينشكف شعرها المفرود اللى ليه معنى كبير جدا في بيئة محافظة مقفولة بالشكل دا … تبدأ تبقى ضهرها في ضهره، بيلفوا حوالين بعض، عيونهم تتلاقى .. شريهان والجد والسيدة العجوز بتاخد بالها من العار دا، فيقرروا يقولوا لرجل عجوز يتدخل بالعصاية ويفصل بينهم فتقع وهي بتنوح من الوجع.

#عرق_البلح

#شريهان

#سوسن_عامر

#من_عنيا