ترشيحاتي لـ أفلام تتحدث عن الإيدز

نشرت هذه المقالة على صفحة المُدونة بالفيسبوك، في الأول من ديسمبر في اليوم العالمي للتعريف بمرض الإيدز

في اليوم العالمي للتعريف بمرض الإيدز/ مرض نقص المناعة … لما بنتكلم عن المرض دا بيجي في بالنا أفلام كتيرة

بس أنا برشح بشدة فيلم The Normal Heart

الفيلم دا بيحكي عن بداية انتشار مرض الايدز .، الفيلم كله بيدور في عوالم المثليين ومجتمع LGBT ..

والإعتقاد الخاطئ اللي لسه موجود بشكل ما للأسف أن دا مرض متخصص للمثليين أو عقوبة ليهم.

المخرج وصانع الأعمال “رايان ميرفي”، عرف يحول مسرحية مشهورة بتحمل نفس الإسم لعمل درامي مميز جدا.

ميزة الفيلم دا أن معظم العاملين فيه مثليين/Gays

ودا مهم جدا، لأنه بيحكي من قلب الحدث، تناول مختلف، مش زي بقية الأفلام بتتكلم من بره، أو بتعرض كليشيهات وصور منمطية ساذجة وحمقاء عن الإيدز.

بداية من “ميرفي” نفسه اللي بعتبره صورة مميزة للمثليين في عالم الدراما وهوليود، وبحب متابعة أعماله لأنه دائما بيحكي بطريقته الخاصة، بمشاعر وأفكار داخلية أوي يمكن نفتكرها معروفة ومفهومة، ولكن دائما معاه بيكون ليها بُعد تاني… وصولاً لأشهر أبطال الفيلم 😍

كله أتقن عمله وقدموا لينا فيلم صعب يتنسي.

للتوضيح بس: فيه لقطتين عُري فقط .. بس معمولين بإحترافية وبيخدموا الفيلم – علشان الناس اللي مش بتحب المشاهد دي – لقطة في أول الفيلم، والتانية في نصه في مشهد حميمي رقراق جدا خلى الدموع بعيوني.

الفيلم دا من أفلامي المفضلة .. وعندي فرحة طاغية أن معظم اللي بحبهم موجودين فيه.

نسيت أقول أن الفيلم فيه جوليا روبرتس على فكرة 😍

طبعا فيه أفلام تانية زي فيلم أسماء، ودا فيلم مصري رائع ومن قلب المُعاناة العربية المشهورة بالوصم.

وفيه فيلم أمريكي قديم أوي وتقريبا مفيش ترجمة عربي ليه اسمه An Early Frost

يعتبر فيلم مهم جدا لأنه كان من أول الأعمال المحترمة اللي بتتكلم عن دخول مفهوم الإيدز للسينما والدراما، ويكون عمل بيتكلم بصدق، ويصلح للعائلة لأن مفيش مشاهد تسبب ضيق لأي حد خالص.

وطبعا رائعة “توم هانكس + دانزل واشنطن” وفيلمهم Philadelphia