فيه بروكلي في البيت، اسيبه يبوظ يعني؟!!

حاشه وماشا يعني 😀

لذا قمت زي الشطورة بفتح اليوتيوب علشان أعرف هذا الكائن الأخضر ممكن أغسله وأقطعه إزاي .. المشكلة إنهم كلهم بيتكلموا عن البروكولي المحترم اللى عندهم اللى بيتغسل بماء جاري والكلام الفاضي دا .. محدش مقدر حالتنا هنا، دا الخضار مرشوش مبيدات لحد ما اشتكى 🙁

لذا قمت بفصل الزهور عن بعضها، وازلت الشجيرات الصغيرة الجانبية، ثم سلطت عليهم ماء جاري، ثم وضعتهم في ماء وخل علشان التعقيم، ثم غسلته مرة أخرى في ماء جاري ولو كنت أطول أولع فيه علشان أرتاح نفسيا كنت عملت 😀

في البداية سلقت نصف كيس مكرونة أقلام .. ودا بيكون بغلي الماء في حلة، ثم اضافة الكيس عليها والتقليب لحد ما المكرونة تستوي.

ثانيا: البروكولي

غليت الماء في حلة تكفي الكمية، ثم اضفت البروكولي لخمس دقائق تقريبا، ثم قمت بتصفيته ووضعته لثواني في ماء بارد مع ثلج لكي يحتفظ بلونه، ثم قمت بتصفيته مرة أخرى.

احضرت حلة أخرى، وضعت القليل من زيت زيتون، ثم اضفت الثوم المفروم – قطعته بالسكينة لقطع صغيرة ولم افرمه في المفرمة – مع التقليب بدأ الثوم يتحول للون الذهبي، اضفت البروكولي وقمت بالتقليب المستمر، متقلقوش ان الاكل يتحرق لأن البروكولي هيطلع الميه اللى جواه ودا هيساعد في التقليب.

ثم اضفت كوب حليب مخلوط فيه معلقتين دقيق، مع التقليب المستمر على نار هادئة قمت بإضافة بعض الفلفل الأسود، القليل جدا من الشطة .. حسيت مع التقليب أن الصوص مش كافي، فأضفت شوية حليب تاني.

لما المكونات تبقى متماسكة مع بعض، بضيف المكرونة واقلب تاني وبعد دقيقتين على النار بيكون الطبق جاهز …

الصورة فوق دي هي شكل الطبق فعلا بعد ما خلص.