صديقي أغراني بسهولة عمل البيتزا، عندما أحضر أمامي قرص العجين المفرود من المخبز القريب .. فظلت تجربته في دماغي
بعد يوم مُرهق بكل معاني الكلمة، وفيه ناس في البيت عايزة تاكل .. فجأة الذكرى اياها جت في بالي .. طلبت من صديقتي تحضر ليا من مخبز السمون/الفينو عجينة بيتزا ..
هوب لقيت نفسي مع نصف كيلو عجينة عجيبة، تمارس هوايتها في الامتداد والتوسع .. فهمت بعد كدا من صحابي أنها لسه كانت بتتخمر علشان كدا حجمها بقى أكبر وكان بيكبر كون المطبخ كان دافي.
احضرت صينية، رشيت رشة دقيق على سطحها للتأكد من حماية المكونات إنها تلتصق أو تتحرق ..
فردت العجينة بالصينية …. وفوقها وضعت صلصة مخصصة للبيتزا .. رفضت استخدام الصلصة الجاهزة بالسوق، وقمت بصنعها بنفسي (( فرمت 2 حبة طماطم متوسطة مع بصلة متوسطة، ثم وضعتهم في حلة صغيرة وأضفت توابل: الريحان، الزعتر، الفلفل الأسود، القليل من الشطة))
وفوق الصلصة وضعت محتويات علبة ونص من التونة – بعد تصفية الزيت طبعا وتبهيرها بالفلفل الأسود والليمون والقليل من الشطة – ثم وضعت فلفل أخضر رومي مُقطع لمربعات صغيرة + مكعبات صغيرة من الطماطم + حلقات صغيرة من البصل الأخضر+ قرن فلفل حامي مقطع حلقات أكبر علشان نقدر نلاحظه ونشيله بسهولة والناس متدعيش عليا لما تلاقيه حار.
أخيرًا وضعت جبنة موتزاريلا مبشورة …
وضعت الصينية في الفرن، طبعا بعد تسخينه خلال مرحلة تجهيز البيتزا .. للأسف لم انتبه للوقت علشان أعرف استغرقت كام بالضبط إنها ستوي .. ولكني كنت بكشف عليها كل فترة إني بحرك طرف من طبقة العجينة قليلا لأعلى بواسطة شوكة .. لما لقيتها لون العجينة من الأسفل اتحمص كدا تعتبرها بقت جاهزة
صحتين 😉
حلوة اوي وعجبت ولادي جدا قعدو يتحايلو عليا اعملي بيتزا بيتزا اعملي ههههههههههه وانا خايفة لتبوظ مني بس الحمدلله طلعت جميلة
أنتي جميلة وأطفالك كمان
(^0^)
بصي يا عزيزتي، متقلقيش من البيتزا خالص، الموضوع فعلا سهل جدا .. بل أزيدك من القصيدة بيت، بقالي أسبوعين بجرب أني أعمل العجينة بنفسي، ومش بلتزم بكل الوصفات المطروحة بالأنترنت لأن كلها زيوت كتيرة وفيه بيحط سكر، وفيه بيحط ملح .. أنا زرجنت وعملتها زي ما قالوا كطريقة ولكن بالوصفات بتاعتي أنا .. محطتش لا زيت ولا سكر ولا ملح وطلعت رائعة .. حلاوة البيتزا أنها عجينة يعني نقعد نلعب بيها ونحط دقيق لحد بس تطبل تلزق في ايدنا .. وهوب نحط عليها اللى نلاقيه في وشنا وبتطلع حلوة علشان احنا حابين اللى بنعمله ومشتاقين ناكل حاجة حلوة …. صحتين على قلبكم يارب 😉