وصفة شوفتها من فترة على التليفزيون على قناة لبنانية، كانت خبيرة التغذية تتحدث عن المدمنين على الحلوى، أو الهفّات اللى بتطلعك فجأة أنه “عايزة حاجة حلوة دلوقتي وحالا” …

وفي نفس الوقت محتاجين شيئ صحي .. فعرضت طريقة عمل “بسكويت الشوفان مع تمر”.

روحت زي الشاطرة السوبرماركت أدور على معجون تمر بدون ما يكون عجوة .. هتقولولي ايه الفرق يا فالحة ما المعجون هو العجوة

اقولك لاء سيدي القارئ، ما دا اللى انا اكتشفته من خبيرة التغذية والسوبرماركت معا … أن العجوة دي مسكرة جدا وفيها سُكرية رهيبة ..

اللى احنا عايزينه هو تمر مفروم منزوع النواة، ودا بيكون تمر بدون إضافات عليه، ويناسبنا في الحمية و أسلوب الحياة الصحي.

تُحضر بسكويت بالشوفان – علشان الشوفان صحي وبيشبعك – ونكسره تماما في وعاء عميق .. خليه فتافيت من الآخر، ومتعملهاش بإيدك بس لان هيطلع فيها قطع مش مطحونة كويس وعاملة زي المسامير.

وبعدين نحط التمر ونخلطهم مع بعض على البارد … ثم تضيف لهم عصير ليمون علشان يعادل نسبة السُكرية ويخلي طعمها لطيف وابن ناس.

نصيحة هاتوا اكواب عمل cupcake بأشكال مختلفة وأحجام مُختلفة، وضعوا فيها الخليط بحيث ياخد شكلها .. وضعوها في الثلاجة لحين التقديم

هيكون عندك أشكال مختلفة وممتعة إنك تاكل نفس الشيئ بشكل جديد بدل ما كله شبه بعضه كدا .. أو اعملها كورات بإيدك  زي ما في الصورة فوق.

وصحتين (^0^)