مين أكتر شخصية نسائية شيفاها تصلح تكون قدوة ؟

سؤال طرحه جروب على الفيسبوك يُدعى  Superwomen stories

فأنا طبعا مش هسكت هههههه .. قصدي إني هرغي كالعادة يعني 😀

مش هنكر إني فكرت كتير أوي في السؤال دا …

إنه مممم حد قدوة … المصطلح دا عادة لم أكن أفكر فيه، مجرد اعجاب بأشخاص معينة في مواقف مُعينة ثم ينتهي الأمر.. هما في حالهم وانا في حالي

ودا ما ربتني عليه عائلتي ومُجتمعي لإنه من وجهة نظرهم، مستحيل ابقى حاجة عدلة.. بل مفيش حد عِدل اصلا..

لا توجد سيدة قوية وناحجة الا لو اتبعت التركيبة اللولبية في الكوكب الصديق التي تُوضح قد إيه إنها (ست شاطرة في بيتها وشغلها وولادها دكاترة ومهندسين وجوزها متهنن وشيلاه من على الأرض شيل) .. غير كدا يبقى ست فاشلة وتحمد ربنا انها لقت اللى يتجوزها بمنظرها دا ..

ولكن فجأة، وتحديدًا في السنوات الأخيرة أصبحت أتعامل مع العديد من الأشخاص الذين أتمنى فعلا أن أكون مثلهم .. رجاء طاغي أن تتحق تلك الأمنية.

أول تلك الشخصيات: my idol

Mim: هي سيدة رائعة من الدنمارك، مازلت في الثلاثينات

وجودها بيفرحني جدا، لانها بعيدا عن كونها إنها انسانة جميلة من جوه ومن بره الا انها حد مهتم بصحته جدا.. هي ماشية بنظام Vegan

كل شيئ بتُرجعه للطبيعة لذا لا يوجد للمُعلبات، الوجبات السريعة، السُكريات، الأملاح مكان .. فطعامها صحي للغاية…

ومش ماشية تبشر بيه في كل حتة بل كفاية هي تتعامل بطبيعية علشان احنا نحب نبقى زيها أو على الأقل نقرب من الفكرة دي .. فكرة إننا نكون أصحاء.

رياضية جدا بشكل سلس، مش تحس إنه ياااااااااااااااااه هروح أجري كذا كيلو، بل كإن الرياضة في دمها .. بتمارسها أنواع كثيرة جدا مختلفة .. بتمارس الصوم والرياضات الروحية علشان كمان تبقى بخير في جسمها و روحها .. بتشارك في أحداث رياضية دولية ومحلية for good cause بدون كلل أو ملل .. بتشارك في أعمال خيرية بإيدها مش من بعيد لبعيد، وداعمة جدا للناس حواليها بإبتسامتها وجهدها…

مش من الناس بتاعة الطاقة الايجابية المستفزين اللى يحسسوك إنك مجنون وبتشد في شعرك وفقري ولازم تروح تنتحر حالا ..

بل بجانبها كنت أشعر إنني بخير .. كنت أشعر بفرحة تملأ قلبي .. اشعر معها بالطاقة والإشراق .. كنت أحب مشاركتها الطعام رغم كوني نباتية وهي “فيجن” ولكنها كانت تُشجعني ونختار الطعام سويًا، ولم تعترض عليّ أو تُسفه من توجهاتي ومُفضلاتي.

الشخصية الثانية:

وبالتأكيد المُعالجة النفسية “ايفا”:

شخصية تعرضت للعنف المنزلي منذ الصغر، ولكنها كانت قوية للغاية ولما كبِرت قررت تشتغل في المجال النفسي كُمعالجة لكي تُساعد الناس، لإنها هتكون أكثر حد مُتفهم وجعهم علشان هي كمان اتوجعت واتكسرت بدل المرة كذا مرة ..

غيرت البلد اللى عاشت فيها عمر بحاله – واللى احنا بنعتبرها بلاد الأحلام – وبدأت حياة من جديد في بلد جديدة هي الإمارات ..

عملت عيادتها بالجهد والدموع، وعانت ماديًا ومازلت، ولكنها واقفة بقوية مُصرة إنها تكمل في شغفها ودعم الأخرين ..

رغم إن اللى حواليها في كل مرة يقولوا لاء دي هتبيع عيادتها وتشتغل أي حاجة تانية أو ترجع بلدها ولكنها في كل مرة بتثبت إنهم مش فاهمين حاجة خالص..

أما عن الشخصيات العام.. 

Lady Diana  الله يرحمها، رغم موتها ولكنها هتفضل في قلبي طول العمر

 الرائعة دائما وأبدًا Ellen DeGeneres

و Angelina Jolie  وتطور شخصيتها الأكثر من رائع، مُتابعتها تقوم وتسقط حتى وصولها لدرجة خُرافية من الجمال والنضج، هو تعريف عن ما هي الإنسان .. هي تجربة إنسانية غنية ومُتكاملة تمشي على قدمين.

الشخصيات دي عفوية وجميلة، بتهتم بالآخرين ودعمهم .. بيبذلوا كل جهدهم علشان دا .. بعيدين كل البُعد عن مشاعر الغرور والمنظرة بل بيتصرفوا بكل طبيعية .. شخصيات اتعذبت في حياتها وبتحاول تسعد الآخرين كل واحدة بطريقتها المميزة ..

شخصيات لما تشوفها تحس بمعاني (الجمال، الإنسانية، احترام الآخر، الخير).

مش هكون مُبالغة لو قولت، إن كل شخص بقابله شخصيًا بيكون فيه صفة أو حالة بتكون قدوة ليا، وبتمنى أكون زيهم ..

تعرفوا، يمكن يجي عليا يوم حد يحس إني مُفيدة بشكل ما، ووجودي مُحبب وبيسيب أثر كويس في النفوس وأبقى أنا قدوة كمان.