البرامج الثقافية / الطبية / الدينية التي تقدم يكون من ضمنها تلقى مكالمات المتصلين بالنسبة لي هي صداع.
شعور إنه أضحك عليا .. لا أنا خدت معلومات من الضيوف عن موضوع الحلقة .. ولا أنا عرفت أجابات شافية لاجابات المتصلين الحائرة.
وهذا يظهر واضحا في البرامج الدينية خاصةً، في أول البرنامج نعرف إيه هوه عنوان حلقة اليوم.. بس قبل ما تسول لك نفسك وتنشكح وتقول يا حلاوة موضوع الحلقة دا مهم فعلا وفرصة أقعد وأسمع .. بتلاقي كمية هائلة من المكالمات الهاتفية منهالة على رأس الضيوف والمذيعة وأقدر أقولك إن أسئلتهم دي بتتكلم عن كل حاجة في الكون من أول الذرة لحد السما بدون ما قربوا ناحية موضوع الحلقة ..
بتقول موضوع الحلقة فين طيب؟ اقولك هتسمع حد بيسأل عنه بعد حلقتين كدا في مكالمة تليفونية ليها موضوع تاني خالص..
اتصالات كتيرة واسئلة متنوعة وطبعا وقت البرنامج مش بيكفي إنه يتم الاجابة على كل الاسئلة دي .. يبقى خلاص مبروك عليك .. مش سمعت الاسئلة خلاص بقى متزهقناش يعني .. ناس غريبة والله!!
في الواقع كل الحلقات شبه بعضها عبارة عن اتصالات تقطع محاولاتك لفهم موضوع الحلقة.
وهذه التمثيلة يؤدي فيها المتصلين دور رائع ايضا .. فهم يتصلوا من اجل أن يناموا مُرتاحي الضمير بالاجابات السريعة اللى حصلوا عليها على الهواء مباشرة.
كيف لإنسان طبيعي أن يطلب الفتوى من شيخ على “الهاتف” على حكم طلاق زوجته؟
أو يحدثهم عن ميراث؟
هل أصبح الناس مستهترين بحياتهم ودينهم لدرجة عدم الرغبة في تحريك رجليهم شوية لحد دار الافتاء وشرح الأمر بالتفصيل ويناقش ليعرف الاجابة المناسبة لحالته التي للصدفة لن تتشابه مع غيرها.
اذا افتى الشيخ على التلفاز إن حلفانك ياابو الرجالة بالطلاق نافذ .. هل ستجري على زوجتك وتفرح قلبها انه “افرحي ياانشراح انتي طالق واحنا قاعدين في الحرام بقالنا أسبوع” … هذا جنون.
وأشخاص يطلبون علاجات ببعض الكلمات البسيطة، فأصبح من الطبيعي تسمع تلك السيدة تتصل بطبيب وبتقوله “أصل أنا رجلياا بتوجعني فأخد إيه!!!
#برامج_تليفزيونية
#مداخلات_هاتفية
#فتوى_تيك_أواي
#تدوينة_كل_يوم
#اليوم_21
Leave a Comment