الحمدلله قدرت اشتريت نسختي من كتاب “منهج مجراية لإعداد الطفل”.. وصلني عن طريق البريد.

رغم إني مش متجوزة ولا عايزة يبقى عندي أطفال بس كان يهمني جدا إني أقرأ المنهج دا جدا، وخاصة إني متابعة لـ محمد عيد – صانع المنهج – من فترة وبقرأ مقالاته عن التربية، وحكاياته مع ابنته الجميلة “شغف”… والكوارث اللى بنعملها بدون ما ناخد بالنا في الأطفال وبنظن أنهم مش فالحين والحقيقة أن الغلطة مننا إحنا، إننا مش بندور وبنهتم نذاكر علشان نعرفهم أكتر.

في آخر عمل لي، كان مطلوب مني العمل مع الأطفال ومراهقين من سن 5 سنوات لحد 18 سنة وكنت “بشد شعري حرفيا”

مش لإنهم مشاغبين، مش هنكر إن دي مرحلة سنية صعبة، لذا كنت حذرة جدا في التعامل إني مغلطش غلطة تعلم في أرواحهم وقلوبهم طول حياتهم.. بخلي بالي بتسخدم كلمات إيه، بتحرك إزاي، بتصرف إزاي مع كل ردة فعل منهم ..

تقريبا كنت أنا الموظفة الوحيدة اللى كنت بروح معاهم للحمامات كمان، مش بس بسيبهم عند الباب وأمشي وخاصة لو كانوا ولاد مش بنات، بل كنت بفتح باب الحمام الكبير واحط وش رجليا لمنع غلق الباب، وأقف خارجه وأخلي الطفل يدخل الكابينه لوحده وهو عارف أن فيه حد واقف بره مركز لأي صوت وحركة وهيتدخل لحمايته دا في أي لحظة، علشان أنا عارفة كويسة يعني إيه حد يتحرش بأطفال…

كنت ببذل كل جهدي إني أصلح الأخطاء اللى مارسوها عليا خطأ .. ومش هنكر إني في أوقات كتيرة كنت بقف عاجزة مش عارفة أتحرك صح رغم إني قرأت المعلومة، ولكن قراءة فقط ليست كل شيء، مش دايما هتخلينا نتحرك أفضل، إحنا محتاجين جهد وتعب وتفكير وقراءة مرة وأتنين وعشرة في الحاجات دي.

أنصحكم بشدة بشراءه، علشان نعرف ونتعلم وسائل تساعدنا نتعامل مع الأطفال لما نفهم هما بيفكروا إزاي، ونفتكر إننا كنا زيهم زمان أطفال مش هنبص لهم من اللحظة الحالية إنهم مالهم دول، وليه بيجروا وليه بيتحركوا وليه بيعملوا.

للشراء: تواصلوا مع الصفحة لتتعرفوا على طرق الإرسال والدفع المتنوعة، والإرسال داخل مصر وخارجها 

https://www.facebook.com/megraia.curriculum

لمتابعة حساب “محمد عيد” على الفيسبوك:

https://www.facebook.com/Muhamedied