::Photo credit goes to its owner::
نيجي لتاني حاجة ممتنة لنفسي عليها 
😎
إني عملت 5 سيشونز تدريب رياضي مع مدرب
🎉🎉 (تصفيق حاد) 
😂
البداية كانت الشغف الذي لا يموت ناحية الرياضة، من صغري وأنا عندي حلم إن الرياضة تكون من ضمن أحداث يومي، ومش بس كدا بل أكون رياضية كمان .. ودا كان خلاني وأنا مراهقة أقضي جزء كبير في العاب القوى (جري وقفز عالي)، ولعب كورة يد وطايرة.
وطبعا مع الحياة الهايلة اللى أنا عايشاها الحلم دا أدفن بس بكتشف إن فيه الروح لما بشوف الجميلة الخلابة “Mim”، إنسانة أتعرفت عليها في الإمارات وبتمارس الرياضة كإنها الاسناك اللى في وسط اليوم بكل سهولة ومحبة وشغف .. ومن بعدها عرفت أكونت المُلهمة “نادية العوضي”، اللى أكدت ليا إن العمر مهما كبر، ومهما كنت مش بتمارس رياضة من قبل فإنت دايما مش متأخر وتقدر تبدأ .. وهي بدأت في الأربعينات 
😍 ومش بس كدا، بل تسلقت جبال، وبتشارك في السابقات الثلاثية (جري + سباحة+ ركوب دراجة)
واخيرًا صدفة خلتني أشوف أعلان للمدرب “حسين البنا” وحاطط رقمه للتواصل معاه لو كنت جدي في الموضوع .. فضل الكلام في بالي أسبوع لأتصل بيه في النهاية وأتجاوز أي معوقات وأجي في ميعادي وأخد أول حصة معاه.
بعدها لقيت صديقتي “منى” بتتكلم عن تجربتها في الجيم وإنها قررت تاخد خطوة مهمة وتبدأ وهي خطوة ضخمة جدا محاربين الملل والإكتئاب والظروف والحر ..
وهوب الاقي الجميلة “رحاب هاني” كمان بتنشر صورها في الجيم وهي بتبذل كل جهدها هناك.
الجو المُشجع دا جميل جدا، وخلاني أفكر كمان أكتب أنا كمان يمكن حد يتشجع زيينا ويكمل ..
مش هنكر إن الذهاب للتدريب شيء مرهق وبقعد أقنع نفسي إني أبقى شطورة وأكمل .. بحس بالإحباط كتير وأنا مش عارفة أعمل الحركات .. وبعك عك السنين في الأكل .. والطريق طويل .. طويل أوي .. بس أنا بحاول أفكر نفسي بقاعدة ( صفر – وواحد ) .. أنا في اليوم دا جبت صفر ولا واحد؟
– إني روحت الجيم دا (واحد)
– بذلت جهدي أيا كانت النتيجة، ومهما كانت التمارين، وهل قدرت أعملهم كلهم ولا لاء دول كلهم (واحد)
– إني بعمل تمارين الاستريتشينج في البيت علشان أقدر أكمل في التمارين، وأنا حاسة إني عايزة أعيط وعندي كآبة تغرق الدنيا كلها دي (واحد).
– إني أنجح في أكل وجبة متزنة حتى لو وجبة واحدة بس في اليوم وبعدها هعك دي (واحد).
– أتحمل الألم بتاع العضلات وأنا عندي قصور كتيرة زي الرئة اللى شغالة بنص القوة، والمرض المناعي اللى بيصيب العضلات، وتوقف رجليا بشكل كامل وحرفيا عن العمل ومش بعيط من خيبة الأمل والطريق الطويل اللى بحس إني ممكن جدا معرفش أكمله دا كله (واحد) .. وواحد صحيح وكبير وضخم في الحياة.
مش عايزة أقيس من 10 وأشوف أنا جبت كام لإني عارفة أني مش هرضى بالنتيجة، والحكاية مش بتقاس بالشكل دا …
أنا هبذل كل جهدي علشان أسجل (واحد) بتاعي .. وبشجعكم أنتم كمان تسجلوا واحد ونقول لبعض ونشجع بعض أكتر 
Leave a Comment