كوني واثقة من نفسك قوية WenDo

من شهرين تقريبًا في الزقازيق في إيفنت خاص بـ Superwoman قابلت الجميلة “آلاء” ممثلة جروب WenDo، وكانت تجربة مميزة معاها، وكنت سعيدة ومتحمسة ليها جدا إني أكمل فيها .. فساعدتني إني أقدر أتواصل مع الجميلة “مروة” مدربة في القاهرة، علشان أقدر أكمل هناك بدل السفر لمحافظات بعيدة..

وانتظرت اللحظة اللى تبدأ فيها مجموعة في القاهرة، ويشاء الله إنه أخيرًا يكون فيه جلسة في المعادي .. والكوميدي في الموضوع، أن كل الحضور كان من أماكن بعيدة جدا عن المعادي، ولكننا قررنا كلنا بدون تخطيط مسبق، وبدون معرفة بعضنا البعض، إننا لازم نحضر الجلسة دي (^0^)

في البداية هعرفكم على  WenDo:

هما جروب مهتم إنه يدعم الفتيات، ويزوّد الثقة جواهم لحماية أنفسهم ضد التحرش أو الأذى عمومًا ، ولكل الأعمار… وهي إختصار لكلمة “طريق النساء” ..

تقديم الدعم دا في مصر بيتم في مدن كتيرة، في عدة مناطق في القاهرة الضخمة، فعلا المدربات بيبذلوا كل جهدهم علشان يقدموا بيئة آمنة للفتاة إنها تقدر تحضر في جو جيد وتخرج منه وهي حاملة طاقة وقوة مكنتش تعرفها عن نفسها، وكل دا خلال جلسة يوم واحد بعدد ساعات محدود.

الجلسة بتكون تقريبًا 5 ساعات، ممكن تبقى أكتر أو أقل على حسب الموقف والمتوقع شرحه يومها ..

كنت متحمسة ومتوترة كعادتي الأثيرة 😀

ولكن مدربتنا “مروة” كانت لطيفة جدا لأبعد حد، كان الجو حميمي، الساعات مرت بسرعة لدرجة إننا كنا عايزين نقعد أكتر ونكمل ..

اتعرّفنا على حدودنا الشخصية والجسدية، وإننا نرفض أن حد يتعدى على الحدود دي، إزاي لو حصل حاجة ضايقتنا نقدر نطلب المساعدة، وإننا نحمي نفسنا وحدودنا دي بالشكل وبالطريقة اللى نرتاح لها وتوفرلنا الأمان  ..

وإزاي نتعلم نقول “لاء” بصوت عالي .. قدرتنا على النطق بيها ممكن تظهر إنها سهلة جدا، ولكن الحقيقة غير كدا .. إحنا مجتمعنا ربت البنات خصوصًا على أن مفيش لاء تصدر منها .. هي تستقبل “لاء” عادي من أي حد .. ولكن لا تكون هي المصدر دا أبدًا.

والأهم، هو اتعلمنا إزاي نطلع صوت أصلا، إزاي تتعلمي تنادي بصوت عالي وتطلبي المساعدة .. فيه بنات زيي عايشين جو “وضع الصامت / silent mode”، وفكرة أنهم يصرّخوا ويطلبوا المساعدة بصوت عالي يعتبر إعجاز علمي 😀

جسمك، ملامحك مش عار، أو إنك لازم تجري وإنتي ماشية في الشارع علشان محدش يشوفك .. إنتي مش مصيبة لازم تخبيها وتحزني أنك بالشكل والمواصفات دي .. بالعكس، إنتي جميلة أوي لدرجة أن محدش بيحب يخلي الجمال في الدنيا، علشان هما كائنات كريهة.

إزاي تستخدمي ملامح وجهك، عيونك في  التعبير عن الرفض .. إنك غضبانة من اللى بيحصل ومش هتسمحي لفلان أنه يقرب من حدودك ويتعداها …

إنك إزاي تقدري تختاري طريقة التحذير والرفض، إنك تجعليها كلمة بسيطة صغيرة، واضحة، مفيش أي إلتباس فيها، بصوت عالي وواضح وصارم، ملامحك كمان تكون بتدلّ على الكلمة دي.

كانت فيه مواقف تمثيلية علشان يتعرض أدامنا مشاهد حياتية بتحصل لينا، وإزاي نقدر نتعامل معاها ونتصرّف .. والأهم إننا نثق في حدسنا ، لما قلبنا يتقبض من شخص معيّن بيكون فعلا بنسبة كبيرة هو خطر … إن إيه التصرفات اللى ممكن نتوقع إنها عادية ولكن هتكون سبب أن الموضوع يتقلب ضدنا بشكل أو بآخر.

تدربنا على بعض التكنيكات البسيطة اللى ممكن نعملها لو حد هاجمنا، وكل  واحدة فينا خرجت من الورشة دي متفاجئين إننا نملك قوة فعلية، إننا نقدر بشوية وعي وتعلّم بسيط نحمي نفسنا من أي تحرش …

لمتابعة صفحة الفيسبوك الخاصة بــ WenDo – طريق النساء

https://www.facebook.com/WenDo.WP/

Leave a Comment