::Photo credit goes to its owner::

الوجبة دي كانت إختراع لحظي نشأ بناء على مواعيد شغل بابا

كان يوم الإثنين هو اليوم الوحيد اللى مفيش تقريبا وقت كافي من ميعاد مرواحنا من المدرسة وقدوم بابا من الشغل .. يعني لازم ننضف البيت ونعمل أكل للراجل اللى جاي من شغله وكله في نفس ذات الوقت ..

لذا تأتي وجبة الإثنين المجيد…  “التونة”

المكونات:

– علب التونة قطعة واحدة ولازم تكون تونة نضيفة .. فيه علب تونة بتحمل كمية زفارة غير طبيعية وشكل القطع اللى فيها مضروب بالجزمة ولونه مُزبهل وحاجة عذاب يعني …

– فلفل رومي ألوان.

– طماطم

– بصل

– زيتون

– توابل (ملح، فلفل، شطة حسب الرغبة، خل، ليمون)

– زيت زيتون

طريقة العمل:

نفتح علب التونة ونصبها في طبق عميق .. نضيف عليها طماطم فقط لإن الخيار بيجيب زفارة مش طبيعية ..

ممكن نضيف فلفل رومي ألوان ، أو بصل، زيتون شرايح ، أو خس بس مش كتير لإنه بيعمل نفس مشكلة الخيار مع الوقت صدقوني إسئلوا مجرب …

ونحط عليهم ملح وفلفل وشطة صغننة و غطا واحد خل وليمونة كاملة ونقلبهم مع بعض وفي الأخر نضيف زيت زيتون.

وكانت بتتقدم على الترابيزة مع بطاطس مقلية وخبز وسفن ( قد إيه كنا صحيين الصراحة :\ )