أكثر شخصية عابرة جنسيًا/ Transgender أثّرت فيا، وخطفت قلبي وعيوني من اللحظة الأولى لما شوفتها في فيلم وثائقي عن العابرين جنسيًا، كانت الرائعة والخلابة (سيلفيا ريفيرا / Sylvia Rivera).

رغم أن الأفلام اللي شوفتها عن العابرين جنسيًا كانت بتتكلم بشكل عام، أو بتتكلم عن شخصيات معيّنة، وكان ذكرى “سيلفيا” بتتكرر كمرحلة من ضمن المراحل .. ولكن أنا حقيقي بحب الست دي.💕

أول مرة شوفتها كان في مشهد من فيلم وثائقي جميل اسمه The Death and Life of Marsha P. Johnson

كان على شبكة نتفلكس، وفي كذا فيلم كمان…

“سيلفيا” كانت واقفة على منصة في أول إحتفالية فخر/LGBT pride لمجتمع الميم في أمريكا… وقفت بتتكلم في المايك بقوة، بوَجع .. كان الألم يعتصر قلبها أنها وغيرها من العابرين جنسيًا وقفوا بكل قوتهم وشافوا المُر وكانوا هما الخطوط الأولى في الدفاع عن الحريات والوجود علشان مجتمع الميم LGBTQ كله..

ولكن لما بدأوا يشدوا حيلهم.. للأسف جزء كبير من المثليين سرقوا الأضواء، بل تم الإستهزاء وإهانة غيرهم من مجتمع الميم، وبقوا بيحسوا بالعار من “الترانس جيندر”، وكمان بيرفضوا وجودهم في مسيرات الفخر الخاصة بهم!

كإن العنصرية لازم تفضل موجودة بينا، حتى لما بتيجي لك الفرصة علشان تاخد حقك بتدوس على غيرك.

“سيلفيا”علشان كانت من قلب الوجع، كانت عارفة إزاي تقدم مساعدات ودعم حقيقي، عملت بيت آمن للعابرين جنسيًا، و المثليين المشردين في الشوراع، و اشتغلت على التوعية عن نقص المناعة البشرية ” HIV” و كانت بتجمع التبرعات للمتعايشين معاه .

كانت إنسانة جميلة قلبًا وقالبًا .. أتعذبت كتير جدًا في حياتها .. لما كنت بشوفها حزينة على الشاشة كانت دايمًا بتخليني أعيط ..

لما صديقتها “مارشا” اتقتلت، من كتر حزنها سابت كل حاجة وقعدت في كوخ من الصفيح، كاد الحزن يقتلها …

جت الحكومة تهدّ المكان بكل جبروت، علشان شايفين إنها وغيرها بتشوّه المكان، كانت واقفة أدامهم بتحارب في سبيل حقها كإنسانة.. كانت واقفة بتكلّمهم وفي حضنها دبدوب محشو بتحافظ عليه دايمًا، يمكن عشان كان هو الدفى في عالم بارد قاسي.

لكِ الرحمة والسلام على روحك إنتي وكل العابرين جنسيًا، وكل مَن يعاني سواء من داخل مجتمع الميم أو من غيره .. أنتم الجمال في هذا العالم ولا تستحقون كل هذا الألم.

#GenerationEquality #orangetheworld #spreadtheword #HearMeToo
#NotOneMore
#16Days
#stop_violence_against_women

#لا_للعنف_ضد_المرأة

#مناهضة_العنف_ضد_المرأة