في حاجات مش بنفهم معناها بشكل “كامل” إلا لما نجربها أو تمر علينا بنفسها، بل كمان لما بتجربها مرة بتكتشف في كل مرة أمور جديدة كإنك أول مرة تتعرف عليها .. يمكن دا بيفسر استخفاف واستنكار بعض الناس وعدم تعاطفهم أو حتى عدم تفهم لمشكلة مطروحة في المجتمع لمجرد إنها لم تمُسهم.
كنت بقرأ طول الوقت عن إن الإكتئاب في بلاد بره موضوع مهم جدا، لأنه بيخلي الناس اللى بتعاني منه أشبه بحد ذو إحتياج خاص، بل ممكن تقول “مُعـاق” فعليا لأنه بيسبب لصاحبه “عائق” بيمنعه عن ممارسه حياته العادية والمعتادة.
خلوني أحكي لكم على تجربتي مع إكتئابي العظيم … فأنا مريضة PTSD / كرب ما بعد الصدمة.
في النوبات الشديدة التي تـضرب كل فترة والتانية، بلاقي نفسي مش عارفة أمشي، أه .. ما أنا تفاجئت برده، هما بيمشوا إزاي؟ بتحرك زي الأطفال اللى لسه بتتعلم المشي.. كإني فجأة نسيت كنت بمشي إزاي طول عمري
نسيت هو بلبس إزاي؟ هو بمسك الكتاب وأقرأ إزاي؟ بتعامل مع الموبيل زي الجيل اللى عمره ما شاف موبيل، علشان كدا وقتها بمسح كل apps على موبايلي، لأني مش قادرة أتحمل وجودهم، وبضع app للعبة فيها ألوان وكور علشان أعرف أتعامل مع الموبيل وأنا قاعدة زهقانة كدا.
ساعات كتيرة بضطر أقرأ الكلام اللى أدامي، الأرقام كذا مرة علشان أقدر أستوعب هو أنا المفروض أعمل إيه بقى، كإني بتحرك جوه نفسي بالتصوير البطئ.
فيه حالة من الإعياء ضاربة الموقف بالكامل … طبيعي ما أنت واقع نفسيا لأقصى درجة فالمحرك بتاعك عِطل …
حاسة إني عايزة خمسة ستة يشيلوا معايا جسمي علشان مش عايز يتحرك حركات بسيطة.
“فقدان الإهتمام” كنت فاكرة أنه موجود عندي من زمان، ولكني دلوقتي بقيت متفهمة لوجوده بشكل أكبر، مفيش حاجة بتدخل قلبي .. كإن فيه حيطة بين الحاجة وبيني، فبتحاول تدخل فتضرب في الحيطة دي وتتكسر .. مفيش فيلم عارفة أشوفه فعلا، ولو فتحته ببقى قاعدة أدامه بعيون لا ترى .. مفيش كتاب عارفة اقرأه او أمسكه .. الموسيقى بقت رمادية أوي ومش واضحة …
وكالعادة “مفيش طعم لأي أكل أو شرب”، إيه اللى بيكون جوانا مرتبط بموضوع الاكتئاب بيضيع الطعم كدا، ويخلينا نحس كإننا بناكل تراب أو ورق ملوش طعم.
لسه الحمدلله مفقدتش المقدرة على الكتابة على الكيبورد، ابطأ شوية بس منستهاش …
أما عن الليل .. آه من الليالي وقتها….
بحاول أنام مش بعرف، أو بنام في بحر من الكوابيس والخوف .. بقعد أتأوه بأنين كدا على أمل الألم اللى تحت جلدي دا يطلع ويخلص .. بس مفيش فايدة،
اشتريت stress ball بضغط عليها بكل قوتي على أمل تخفف الوجع شوية.
هتلاقي دايما حد “فلحوس من يومه” علاّمة في مجاله كـ أحــمــق معندوش دم، يطلع لك من تحت الأرض كدا ويقولك .. “عارف لو بس نسيت موضوع الإكتئاب دا /عارف أنت لو خرجت من البيت كدا وغيرت جو/ عارف أنت لما تخرج لك خروجة حلوة مع صحابك/ متبقاش أسير أحزانك يا ابني / طيب جرب كدا تصلي وتدعي ربنا”.
رغم كل دا بنحارب يوميًا علشان نكمل، علشان ناكل ونشرب، علشان نكلم الناس حوالينا، ننزل شغلنا ونعمل المطلوب مننا في حياة بتجذبنا يمين وشمال بكل قوة علشان نفضل نجري.
سلامي ومحبتي لكل مرضى الإكتئاب
Leave a Comment