What have done today to make you feel proud?

دايما بيقولوا في العلاج النفسي إننا لازم نحط المعاني والكلمات والاهداف أدام عنينا .. إننا مانعتبرش نفسنا عارفينها وإنه شيئ مفروغ منه يعني فإيه لزمة أكتبه، أو دا شيئ على طول بفكر فيه يعني حاضر في دماغي مش هنساه يعني.

ولكن الحقيقة إن وقت ضعفنا بننسى، أو بمعنى أصح المعاني دي بتستخبى ورا حيطة كبيرة فمش بنقدر نشوفها، بنبقى حاسين وقتها بالضعف وضياع الهدف، وتبدأ الأفكار السودا تملى عوالمنا .. ساعتها بنقع.

ولأن وقعاتي كتير، وبفقد طريقي أكتر في كل لحظة سودا زي دي .. فقررت إني أعمل رسائل صغيرة كدا لنفسي علشان أفكرها، هو أنا ليه أصلا بدأت الطريق دا؟

وبدأت أعلقها على حيطة غرفتي، في أقرب مكان أنا ضامنة إن عيني هتيجي عليه كل يوم خلال يومي … أصل مكان وضع الرسائل دي شيئ مهم جدا.

لإن إيه الفايدة إني احطها في مكان صعب أشوفه، أو لازم أروح له مخصوص علشان أشوفه، وقت الضلمة محدش بيفتكر يروح يشوف حاجة، ولو حتى راح ساعتها بيبص ليها بنظرة خاوية إنه “أيوة أيوة، الشدة على الله بقى” :\

الرسالة اللى تحت دي جاتلي وأنا بسمع أغنية أمريكية كان فيها كلام رائع، ومن ضمنها

What have done today to make you feel proud?

الكلمة خبطتني من أول ما سمعتها، إنه إيه اللى أنا ممكن أحسه حاجة حلوة في ((يومي)) بل كمان أشوفها شيئ ممكن أفخر بيه من نفسي وأبقى منشكحة وكدهون.

هل أنا فعلا عندي حاجات بتتعمل في اليوم أصلا؟ إنه كلها حاجات هبلة يعني وطبيعية ومفروض أعملها، فين الإبداع يعني؟ أنا للأسف شخصية تميل للكمال في كل حاجة بتعملها ودا عذاب.

فقعدت أفكر فترة في الجملة دي لحد ما خدت بالي من حاجة، هو أن أصلا عملي ((أي شيئ)) في يومي هو حاجة كبيرة أوي، ولازم أفخر بيها .. لإني ببساطة ((عملت)) من فعل ((عمل وقام)) مع إنه كان ممكن أقضي يومي ((لا أعمل ولا أفعل)) وكان اليوم هيمر برده زي كل يوم .. بس الفرق هنا فيّا أنا شخصيا، إني أحس إني مش طوبة مرمية وكل حد يرميها شوية برجله وهي مش بتعمل حاجة غير إنها تبقى عبارة عن ردة فعل.

لذا بدأت أفكر في الحاجات اللى أنا متخيلاها (مُعتادة وسخيفة وطبيعي تتعمل يعني))

زي إني أمشي على نظام أكل صحي ويتم استبدال خياراتي وعاداتي القديمة في الأكل بعادات صحية، إني أمشي على نظام حياة في الأكل خالي من الحرمان ومحدد بكميات وخيارات صحية بحيث أفقد الوزن الزايد ، إني أحاول أصلي فروضي الخمسة في مواعيدها أولا أو على أقصى تقدير ميجيش يوم جديد أو أنام الا وأنا مخلصة اللى عليا، أني أخلي المشي رياضة يومية حتى لو نص ساعة ، إني أروح الشغل يوميا  …… الخ

مهما كانت الأمور دي بسيطة من وجهة نظرك وأي حد يعملها بصباع رجله الصغير، فهي مش بسيطة لغيرك صدقني، وأصلا ممكن غيرك مش بيفكر فيها من الأساس أو مش قادر يعملها وبيعاني أشد معاناة بسببها.. فاللى بتعمله يُسمى إنجاز.

حاجة كدا لازم تقف لها بزاوية 90 درجة من كتر الفخر من نفسك، من ((القدرة)) إنك تعمل.

مش هقول إني بنجح أعمل كل اللى كتبته كاملا، ولكن لما بعمل منهم حاجة بقعد أقول لنفسي الغِتتة المُحِبة للكمال، إنه على الأقل نجحت إني أخد 1 من عشرة ، بدل ما كان اليوم هيمر صفر من عشرة.

فقررت إني أشارككم أول رسائلي اللى حطاها على الحيطة عندي:

  

What have done today to make you feel proud?

أشياء كثيرة جدا قمت بها اليوم .. فقط فكر فيها جيدا

إستيقاظك اليوم يعني محاولة جديدة وطاقة مشحونة بالكامل

It’s never too late to try.

أنت قوي للغاية

2

فالقوي هو من أهداه الله نعمة الإستيقاظ ليوم جديد

adnck4

الأغنية المقصودة:

Proud – Heather Small

https://youtu.be/eohNF2OkXg4

Leave a Comment