تحديث 1 – عن عمليات تكميم المعدة

حابة أقولكم شوية حاجات مفيدة لازم تاخدوا بالكم منها بعد العملية ..

أولا: ماتخفوش .. أرجوكم ماتخفوش أنتم مش لوحدكم، مش كائنات فضائية وحاسين بألم أو بمشاعر غريبة محدش حاسس بيها .. بالعكس .. صدقوني كل حد خضع للعملية دي فاهم كويس أوي أنتم حاسين بإيه حتى لو الحالات وأشكال التعامل مع الأمر إختلف ..

ثانيا: انسوا خالص أنتم كنتوا إزاي زمان، ومفيش داعي للمقارنة بين صحتكم وقدرتكم زمان ودلوقتي، إنتم حاليا طفل / طفلة صغيرين لسه مولودين .. معدتكم معدة طفل رضيع .. الفرق ان الطفل الرضيع مش فاهم وغير مستوعب لما يحدث، لا يعرف طرق للتصرف..  اما أنتم فالحمدلله عندكم وعي ومقدرة للتعامل ولكن الأمر بياخد وقت…

ثالثا: ماتستعجلوش على نفسكم، الأمر بياخد وقت، العملية مش سحر .. المتعارف عليه أن في أول شهر مُعدل نزول الوزن من 7 إلى 10 كيلو .. أقل أو أكثر بتعتمد على الجسم نفسه، قابليته في حرق السعرات الحرارية، مدى قوته وخلوه من الأمراض التي تُعيق نزول الوزن.

 لو كان وزنك فوق 100 كيلو، النزول سيفوق من هو في وزن 100 أو أقل .. حتى مع الدايت ستجد نفس المشكلة .. الجسم صاحب الوزن الأقل يحتاج وقت أطول وتقنيات وخدع حتى يفقد الوزن… كل ما تكون جربت انظمة دايت كتير كل ما جسمك “بيعصلج / بيتنح / بيطنشك / بيطلع عينك” علشان تخس كيلو واحد .. وبالمناسبة النزول كمية كبيرة مرة واحدة بيعرض حياتك للخطر لإنه بيحرك الأعضاء اللى جوه معدتك من مكانها بعد ما كانت مسنودة بالدهون .. يعني ربنا بيحبك وبيساعدك إنك متموتش وتنزل بالوزن في ذات الوقت.

رابعا: هام وضروي جدا تناول أدوية لمدة شهرين بعد العملية تساعد المعدة على تحمل الأكل، المعدة تأخذ تقريبا 6 شهور لسنة لكي تُشفى تماما من الجروح .. كل فترة عندما أشعر بتوعك يتم صرف لي هذه الأدوية لفترة ثم أتوقف عنها، ثم أعود لها عند الضرورة والشعور إن معدتي ليست بخير.

من هذه الأدوية Controloc / Pantozol

بجرامات عالية في البداية مثل 40 mg ومن بعدها بشهور يتم تقليل الجرعة لـ 20

ففائدته هي تبطين المعدة ومساعدتها على تقبّل الطعام، كما إنها تعالج مشكلة الارتجاع والحموضة .. يجب تناوله بشكل يومي مرتين.

+

لمشكلة البلع وتوقف الأكل في الحلق أو الصدر .. قد يساعدكم الأدوية بتركيب Domperidone يعني أي شركة بتنتج دواء بالمركب دا .. مثل دواء DOMPY

تجمع الأكل في المرئ بيكون بسبب الغازات الصاعدة ومعدل الحموضة، بالإضافة إنك خدت وقت طويل لا تتناول سوى السوائل، فطبيعي المكان بقى أضيق ومحتاج توسيع هيحصل مع الوقت وتدرّج الطعام.

خامسا: معدتك هي طفل صغير، لذا بهدوء يتم تدريج الطعام .. هناك مركبات وأصناف سترفضها معدتك، لا تخاف فهي لم تُمنع عنك نهائيا، كل ما في الأمر انها لا تناسبك في هذه المرحلة، معدتك ستتقبلها بعد شهور وليس الآن .. أنت طبيب نفسك، جرب الأنواع بهدوء وبكميات بسيطة وراقب معدتك لو تأذت توقف وانتظر شهر، بعدها ستجد إنك تتناولها بسهولة بعد ذلك.

سادسا: امتنع عن الطعام الحار – الحوامض – المياه الغازية – الشيبسي وما يشابهه .. معدتك تحتاج أكثر من 4 شهور لكي تستطيع التعامل معهم.

سابعا: في أول شهرين يُكتفى بالطعام الليّن والسوائل، مثل البطاطس المهروسة، الجيلي، كريم كراميل، رز بلبن، كاستر، شربة بلسان عصفور ..حاول تنوع علشان متتخنقش.

ثامنا: ستفقد الكثير من الفيتامينات. حتى لو لم تلاحظوا ذلك في البداية …. ارجوكم خدوا حذركم وتناولوا فيتامينات عن طريق الحقن أو الحبوب على حسب مقدرتكم على تحمل أي منهم .. كل 3 شهور أنتم بحاجة لتحاليل مقدار الفيتامينات في الجسم .. وخاصة الحديد ومجموعة فيتامين باء.

تاسعا: لازم ، لازم ، لازم تاكلوا كل 4 ساعات ومتتأخرش .. وممنوع تصوموا خالص .. عدم الاكل مدة اكتر من 4 ساعات بيخلي المعدة تنشف حرفيا وتاكل في نفسها وبتجرح نفسها وعلشان كدا بيبقى الالم رهيب من بعدها.

عاشرًا: اقدر اطمنكم إنكم لو مقدرتوش تناموا على الجنب اليمين أو الشمال، فدا طبيعي جدا .. أنا استمريت 3 شهور بنام اتجاه واحد فقط وهو على الضهر وكانت من أمنيات حياتي إني أنام على جنب واحد .. خدوها بالتدريج بوضع مخدة طرية وصغيرة على أحد الجوانب وميلوا شوية صغيرة، كل يوم ميلوا اكتر مع وضع مخدات/ وسائد أكتر لتعلية جسمك عن مستوى السرير ومساعدتك على الميل ناحية الجوانب، لحد ما تقدروا تناموا على جانبكم … ضعوا وسائد طرية تحت الضهر حتى يخفف الألم واحتكاككم بالسرير لمدة طويلة ومنع لإصابة منطقة الضهر.

قد تعاني من ذاكرة لولبية، بتوقع تواريخ وأحداث .. عدم تركيز .. توهان .. دا كله راجع لقلة الفيتامينات وطول فترة البنج / المخدر خلال العملية

الاستحمام عمومًا حتى لو جزء فقط من جسمكم بيعطي شعور بالتحسن

المشي ضروري، بيساعد على شفاء الجرح، على مساعدة الجسم على الشفاء بشكل أفضل.

شعر الرأس هيقع كتير بالمناسبة متصابوش بالهلع .. هنشوف له حل مع رفع الفيتامينات الخاصة بالجلد والشعر .

بالنسبة للبنوتات هتلاقوا الدورة الشهرية بتيجي كل شوية في الأشهر الأولى بعد العملية، وخاصة ممكن تيجي تاني يوم العملية زي ما حصل معايا، عادي عادي، بتحصل .. دا اضطراب في الهرمونات وشوية لخبطة لان الجسم اتخض بعد اللى جرى له .. لاحظوا انكم قطعتوا من الجسم (المعدة) حته ودا بيسبب صدمة لسائر الجسم وبيتصرف تصرفات غريبة.. لا داعي للقلق.

هيحصل جفاف شديد في الجلد، أنت نفسك هتحس إنك بقيت زي الصبار اللى بالصحرا .. لازم تشرب سوائل، بالغصب اشرب سوائل في الرايحة والجاية.

شعور دائم في الشهور الأولى بالانهاك والتعب من أقل مجهود… لو فيه شوية هوا شديد ممكن يوقعوك… أنا قعدت 3 شهور في البيت نفسي أعمل أي حاجة، أني حتى أشوف فيلم على الكومبيوتر أو اقرأ كتاب بس من كتر الإنهاك والإعياء كنت عاملة زي القماشة القديمة المهترئة المرمية على السرير.. لا مركزة في حاجة ولا عارفة أعمل حاجة .. كان وقت ممل وشنيع وطويل أوي .. كنت بعيط لربنا يخفف عني ويهون الوقت عليا.

المراحل دي طبيعية بس الدكاترة وفروا المعلومات دي مش عارفة ليه، يمكن خافوا إنهم يخوفونا، يمكن مش فاهمين أبعاد الموضوع كونهم بيعملوا العملية وبيروّحوا ومش عايشين معانا ، أو يمكن لانها تجارة فمحدش هيقولك أن البضاعة فيها مشاكل .. اللى أعرفه أن كل جسم بيختلف عن التاني في طول المدة، في استجابته ، والأهم أننا نقول لبعض .. يمكن معلومات أو ملاحظات هبلة من وجهة نظرك تعطيني أمل أني مش لوحدي اللى بحس بكدا

عندما تشعروا بالخوف وأنكم وحدكم .. اقرأوا تجاربنا هنا

http://omnia-says.com/?p=584

+

http://omnia-says.com/?p=587

+

http://omnia-says.com/?p=593

لما تقرأ الكلام هتعرف انك مش لوحدك .. ان حالتك مش خطيرة .. ان الالم لن يستمر.

انا كتبت التجربة بتاعتي وبتاعة ابتهال علشان كنا حاسيين اننا لوحدنا .. كنا خايفين .. كنا حاسين بالالم وحاسين ان حياتنا باظت واتدمرت ومش هترجع تاني.

فكنت بتمنى ان محدش يحس بكدا زيي .. علشان كدا اتكلمت كتير وقلت كل اللى عندي .. وكل ما افتكر حاجة هروح واكتبها .. علشان تعرفوا انكم مش لوحدكم

اخرجوا، فكروا تقرأوا كتب أو تعملوا أي هواية أو شغل بسيط مش مُرهق .. للأسف الموضوع مرتبط بالنفسيات .. لو هتبقى نفسيتك قوية أو شايفة أنك بطل إنك خدت خطوة مهمة زي دي، كل ما هتبقى صحتك أفضل..  والعكس صحيح.

هدعي لكل حد خاض التجربة دي وغيرها، بدعي لكل حد بيتوجع من أي مرض .. ربنا يحفظكم من كل شر وتبقوا بخير يارب يارب يارب (^0^)

6 Comments

  1. Eva Jajonie Reply

    Happy New Year Omnia .

    This is so great and informative info. I am so proud of you for making your blog alive and active.

    I miss you a lot and hope you and Ibtehal are doing well.

    Take care,

    • Omnia

      Thank you so much my dear (^0^)
      I’m happy to see your comment here .. really I’m grateful to you for reading this post and for visiting my blog *Big Hug* and Happy new year, I wish you all the best.

  2. Afaf Reply

    ربنا يتم العمليه وتوابعها على خير الف سلامه عليكم يا حبيبتى … المدونه رائعه

    • Omnia

      تسلميلي يااااااارب، ربنا يخفف ألم كل الموجوعين ويحقق أحلام وأمنيات الناس ويبقوا دايما بصحة وعافية
      انتي الحلوة ووجودك بجد اسعدني جدا .. ربنا يخليكي ليا

  3. Maram Reply

    شكرا من قلبي انا فيومي الرابع بعد العمليه وخايفه كتير واطمأنيت بعد ما قرأت كلامك

    • Omnia

      حمدلله على سلامتك، إن شاءالله تبقي بخير في أسرع وقت وتفرحي بالنتيجة
      حقيقي ممتنة لردك، وخلى عيوني تدمع أن كلامي طمنك.. ودي كانت دايما أمنيتي أن ربنا يجعل لكلامي وتجاربي فايدة للناس .. يسلملي روحك يارب، وأن شاءالله تطمنيني عليكي (f)

Leave a Comment