كبسولات في السريع – الجزء الثاني

 

::Photo credit goes to its owner::

مُقدمة ثابتة عن القِسم هتلاقوها هنـــــــا

– في حالة حدوث أي فعل تحسّسي من مُنتج معين / دواء / نوع طعام او شراب يجب كتابة دا في ورقة وتحدد بالضبط ساعتها ايه اللى حصل، يعني مثلا لما كلت فراولة أصبت فورًا بحكة شديدة فقط ولكنها لا تتوقف، لما لبست سلسلة اكسسوار كان فيه أحمرار بعد ساعة تقريبا ومحصلش أعراض تانية .. لإن الإحمرار بس ممكن يوضح ان عندك مشكلة مع الاكسسوارات فقط، ولكن انت طبيعي بالنسبة لبقية المعادن زي الدهب والفضة، فمتبقاش اتحرمت من كل السلاسل اللى في الدنيا .. تحديد الأعراض بالتفصيل بيساعد الاطباء في وصف الأدوية ولا يُعرض حياتك للخطر.. مثال السلسلة كان حاجة مش خطيرة زي مُركّب محدد بيدخل في مليون دوا بعد كدا، فالأفضل تكون دقيق شويّة… ويجب زيارة طبيب مُتخصص في الحساسية لعمل اختبار الحساسية لتأكيد المشاكل اللى ذكرتها، او التعديل عليها ثم الإحتفاظ بالنتيجة دائما في الشنطة اللى بتخرج بيها.

– قد تكون هناك أعراض تحسّسية مؤقتة أو متعلقة بظروف معينة (زي ارتفاع درجة حرارة في الصيف أو مشكلة في النظام المناعي عندك..الخ) لذا يجب مراجعة طبيب مختص في الحساسية لتأكيد مسببات الحساسية سواء الدوائية أو غيرها.

– لإجراء تحليل حساسية دقيق وسليم يجب الإمتناع عن أي دواء خاص بمُعالجة بالحساسية قبل الإختبار بأسبوع على الأقل.

– في حالة تناول الدواء على هيئة حبوب، حاول عدم تناول كل الأدوية مع بعض في نفس الوقت، لإنه في حالة تعرضك للتحسس من أي دواء منهم فسيكون من الصعب اكتشافه والقائمة امام الطبيب ستكون طويلة لمعرفة المشكلة، والوقت مهم جدا في انقاذ مريض الحساسية .. تناول أي أدوية جديدة اتنين اتنين، يعني حبتين ثم الانتظار ربع ساعة مثلا ثم حبتين تانيين وهكذا .. في حالة حدوث مشكلة يمكنك حصر المشكلة في دوا إلى اتنين على أقصى تقدير.

– مهم جدا وجود جهاز لقياس ضغط الدم في البيت، الأفضل من ناحية الدقة والنتايج الصحيحة بالترتيب :

جهاز القياس الزئبقي اللى بيقاس بإستخدام سماعة الطبيب .. اسأل الطبيب/ صيدلي تعليمك كيفية استخدامه .. مش صعبة بس محتاجة تتشرح مش أكتر.

من بعده جهاز القياس من الذراع … واخيرا “المعصمي” ولكن لا تتوقع نتائج دقيقة من أول مرة بل يجب قياس 3 مرات ورا بعض واخذ المتوسط منهم.

– حتى لو مفيش حد مُصاب بمرض السكر في البيت، يُفضل يكون في جهاز قياس للسكر، فيه اجهزة سريعة ودقيقة من قطرة دم واحدة .. ودي فايدتها إنك لو شعرت بتوعك ودوخة لازم الأول تتأكد من ضغط الدم (الطبيعي 120/80) ومن بعده قياس نسبة السكر في الدم (الطبيعي بدون أكل 80 .. بعد الاكل زود 20 على آخر قراءة كانت قبل الأكل … المهم لا يتعدّى 200 كأقصى حد ولا أقل من 80).

– الإهتمام بصحة مريض السكر، والتأكد من إنه لم يتعرّض لأي أصابة غير واضحة للعين، عدم جرح نفسه اثناء قص الاظافر وتحديدا أظافر القدم، عدم قطع الجلد الخشن من الكعب .. مريض السكر جرحه يستغرق وقت طويل لكي يُشفى، وقد يُصاب بمضاعفات قد تضطره لبترد العضو المُصاب لا قدر الله .

–  نصيحة لوجه الله، متستخسرش في نفسك حذاء طبي للخروج أو للبيت لو بتقف  فترة طويلة، حتى لو غالي، دا هيوفر عليك ألم ضهر وركبة مُزمن.

– الحذاء الرياضي أنواع، صدقوني مش كله عند العرب صابون، فيه انواع للركض وفيه أنواع مختلفة تماما لو بتمشي على أرض خشنة، وفيه أحذية للدراجات ودا كله مش رفاهية بقدر إنك بتشتري ضهرك وعضمك وصحتك، لأنهم مصمّمين لحمايتك في الأساس مش مجرد تجارة.

– لو هتقفوا فترة طويلة، جربوا ترفعوا نفسكم شوية على أطراف صوابعكم وتنزلوا تاني، قفوا على الكعب وانزل تاني وهكذا، دي تمارين لرجلك علشان الألم ومنع الدوالي.

– لو هتقعد فترة طويلة، جرب تقوم شوية وتقعد شوية، اتحرك من مكانك حتى لو في مساحة ضيقة، حرك رقبتك يمين وشمال وفوق وتحت .. اهمال التمارين دي هتعرف تأثيره للأسف بعد شهر بالكتير.

– تصلّب الرقبة أو الكتف حلّه طبعا مراهم، ولكن الحل العملي والسريع هو إنك تعمل مساج على المكان .. ومش شرط لإن كتفك بس اللي متصلّب يعني متعملش على الرقبة او جزء من الضهر، كله متّصل ببعضه، صدقني ممكن يكون السبب مش كتفك أصلاً.

Leave a Comment