::Photo credit goes to its owner::
كبداية، حابه أضع سبب كلامي عن تجاربي مع الأطباء والتحاليل وغيرها في الحقل الطبي، فبدل من كتابتها في كل مرة، ممكن تشوفوها هنـــــــا
امبارح كانت أول مرة أخضع لتجربة الرنين المغناطيسي … وطبعا كانت أمي قلقانة جدا من التجربة دي، وطلبت مني إني اتحصن بإسم الله، دا غير الكلام الكثير عن إنه يا لهوي لو هيكون “رنين مغلق” … الخ من الحاجات اللى بتدعم شعور الرعب عندك:/
بس لما خلّصتها، لقيتها حاجة مختلفة تماما عن الرعب اللى كان حواليا…
هتكلم عن الموضوع بأبسط شكل ممكن، بدون أي تعقيدات أو مصطلحات، إحنا هندردش مع بعض.
– اولا أشعة الرنين المغناطيسي بيُطلق عليه اختصارًا MRI
– فائدة “الرنين المغناطيسي” هي إنك ببساطة بتخلي الدكتور شايف المكان المُصاب بكل تفاصيله، أدق تفاصيله، كإنه كتاب مفتوح ، فبتسهل على الدكتور معرفة سبب مشكلتك وتشخصيها بشكل أفضل…. بل أهميتها الكبيرة إنها بتساعد الدكتور وقت التدخل الجراحي، فبيدخل كإنه في بيته وعارف مكان كل حاجة فين.
– وقت حجز موعدك للرنين المغناطيسي .. المفروض ومن حقك كمريض تعرف هيبقى مطلوب منك ايه بالضبط … متخفش واسأل ومفيش داعي للخجل.
اسأل عن :
– هل مطلوب إني أصوم ولا لاء؟ .. عادة مش بيطلبوا صيام، ولكن مع أمي طلبوا صيام 4 ساعات قبلها.. فبتختلف من حالة للتانية.
– هل هتاخد حقنة قبل “الرنين المغناطيسي” ولا لاء؟ ووظيفتها ايه؟ وأيه تأثيرها .. أنا وصديقي مخدناش حقن خالص رغم إختلاف شكوتنا.
– الوقت اللى هتاخده في الأشعة قد إيه تقريبا .. أنا خدت من 20 الى 30 دقيقة.
– هل هيكون رنين مغناطيسي “مغلق ولا مفتوح” .. الصورة وكلامي كله عن المُغلق
المطلوب منك:
– اسأل نفسك هل عملت عملية، وضعوا جواك قطعة معدنية أو دعامات زي بعض عمليات الرئة والقلب والمعدة والأسنان؟
حتى لو هتعمل الرنين على جزء تاني خالص من جسمك، من المهم توضيح النقطة السابقة لفني الأشعة قبل عمل الرنين المغناطيسي..
بل خليك دائما على علم بحالتك الصحية بعد أي عمليات، عن هل تم وضع أي قطع معدنية جوه جسمك ولا لاء؟ بل معرفة نوع الدُعامات / القطع المعدنية لإن فيه أنواع لا تؤثر أو تُفسد “الرنين المغناطيسي” فممكن تعمل الأشعة عادي ..
في حالة إنك مش عارف النوع المُستخدم، أو مش عارف ماهية الشيئ اللى جواك، بيتم عمل أشعة X-ray سريعة على المكان المقصود.
ودا علشان يتأكدوا هل فعلا فيه معدن ولا لاء .. بل إنهم استخدموا معايا عصاية الكشف على المعادن – أيوة بتاعة المطارات 😀 – للتأكد من إن المعدن الظاهر في نتيجة الأشعة مش هيأثر على كفاءة أشعة “الرنين المغناطيسي” وإن النتيجة هتكون سليمة تماما.
– لازم أي واحدة متجوّزة تركّز أوي إنها مش حامل، أو حتى شاكّة ولو من بعيد، الموضوع جدّي للغاية، لأنه لو طلعتي حامل فعلاً الطفل مُعرّض للتشوّه والأذى الشديد لو تعرّض للأشعة، بل ممكن تُجهضي أو الطفل يُولد وعنده مشاكل كبيرة.
– لازم تترك “هاتفك المُتحرك” وأي حاجات هتتأثر بالرنين خارج منطقة الأشعة زي بطاقات الائتمان وبطاقات المترو وغيرها .. وطبعا قلع الدهب والفضة ودبابيس الطرحة للمحجبات، Bra اللى فيها جزء معدني برده تتقلع، حزام البنطلون .. من الأخر مطلوب إنك تكون فارغ تماما من أي معدن، ومش شرط تقلع هدومك، انا فضلت بيها بعد ما تأكدوا إنها لا تحتوي على أي معدن.
– اه نسيت .. نصيحة لوجه الله … ادخلوا الحمام قبلها علشان “الرنين المغناطيسي” بياخد وقت 😀
حاليا كدا أنا جاهزة للأشعة …
دخلت غرفة واسعة فيها شكل اسطواني في النص، زي الصورة اللى فوق بالضبط … دا هو جهاز “الرنين المغناطيسي” ونوعه في الحالة دي “مغلق” …
يعني هتنام على السرير وهتدخل جوه الجسم الأسطواني دا …
بجد مفيش داعي للخوف .. المكان من بعيد هيخليك تفكر إنه يا خبر أنا هدخل جوه دا .. أو تجيلك مخاوف إنه يا خبر هل ممكن اتحبس جواه، أو إنه زي القبر … الخ من المخاوف اللطيفة دي – كله من أفلام الرعب 😛 –
عايزة اطمنك إن دا كله مش صحيح …
أنا نمت على السرير، رفعوا رجليا شوية على مسند، وحطوا ثِقل على رجلي لإن الأشعة كانت على الضهر.
هيدوك جهاز انذار بسلك طويل في ايدك، لو أحتجت أي حاجة من أي نوع، حسيت إنك مش بخير اضغط عليه فورًا، هتخرج في ساعتها وهيشوفوا مالك … جرب الجرس قبل ما تدخل علشان تتطمن إنه بيشتغل… متخفش .
هيدوك “سماعة” تحطها على ودانك، لإنك جوه هتبقى سامع أصوات طرقات وتهبيد عالي، فعلشان يحافظوا على ودنك، ولا تصاب بالصداع..
هتبقى سامع الصوت بس مش بالقوة اللى توجعك … في حالتها أمي كانت رفضت السماعة لإنها بتصدع منها، فطلبت سدادات طبية للأذن .. أطلب اللى يريحك، أنت مش داخل تتعذب.
بدأوا يحركوا السرير لحد ما دخلت جوه الجزء الاسطواني، مش ضيق أوي ومش واسع أوي .. على قدك تقريبا .. المساحة اللى بين جسمك وبين سقف الجهاز معقولة ..
للعلم الأجهزة الحديثة مش مقفولة من ورا .. يعني راسك هتكون قريبة من المخرج اللى وراك، يعني الجزء الإسطواني مفتوح من ناحيتين، ودا بيعطي احساس بالآمان أكتر.
مفيش داعي تقفل عيونك، فقط المطلوب إنك متتحركش علشان النتيجة تطلع سليمة وواضحة.
كنت مش عايزة أقعد أفكر في المخاوف، وكنت زهقانة من الوقت .. فلاحظت إن صوت الطرقات مُنغم .. وكان دا شيئ ممتع أوي .. إني اسمع إقاعات تعمل موسيقى جوه دماغي .. هوب الوقت خلص .. وحسيت بإيد بتتحط على رجليا علشان تطمني إنها هتبدأ تطلع السرير لبره .. لازم تقوم بهدوء علشان متحسش بأي شعور بالدوخة بحكم إنك نايم في وضعية واحدة لفترة …
كدا التجربة خلصت ، بس متنساش تسأل أمتى تيجي تاخد التقرير.
متحاولوش تفكروا في إنه “يارب استر هتكون النتيجة ايه؟” .. بيقولوا في الأمثال “اللى تخاف منه، ميجيش احسن منه” .. يعني ممكن ترعب نفسك من حاجة وهو أصلا مش هتبقى كدا، بل ممكن تبقى حاجة أحسن.
دي مجرد أشعة، وظيفتها تساعد إنك تلاقي التشخيص الصحيح لحالتك، اللى من خلاله هتاخد الأدوية الصحيحة وتقوم بألف سلامة.
شكرا أمنية على الشرح المبسط لفكرة ال ام ار اي .. وشكرا لمشاركتنا تجربتك يلي انا شخصيا استفدت منها..سماح
سعيدة يا سموحة إنها كانت سهلة ومش معقدة ومُريحة للقراءة، أنا بتمنى الكل يستفيد منها ربنا يتقبل مني
(^0^)
الله يسعدك طمنتيني انا عندي خوف من الاشعة وراح اعملها بعد 3 ساعات باذن الله كنت خااااايفه جدا من كلام الناس عنها وعندي فوبيا من اشياء كثير ومااقدر اتراجع عن الموعد 😥
سلامتك ألف سلامة، أن شاءالله تكوني بخير وعافية
ما تخافي، هي أشعة متل بقية الأشعات بس طريقتها مختلفة وبتاخد وقت
أن شاءالله تطمنيني أنك بخير .. دعواتي معك
ياريتني كنت قرأت الكلام هاد قبل ما اخضع لتجربة الرنين ، عملتها قبل اربع أيام ، كل كلمة كتبتيها واقعية جدا ، اقتنعت فعلا ان الحكم عن الاشياء عن بعد لا يمت للواقع وللتجربة بصلة ، انا كنت مرعووووبة قبل الموعد لدرجة اني ما بقيت حاسة برجليا وحاسة اني اتشليت فعلا لكن لما دخلت الغرفة ونيموني عالسرير سبحان الله كل مخاوفي راحت وما كنت حاسة بأي قلق نهائي ربنا سبحان الله بدد الخوف ووصبرني وكل شي تم بسهولة ، مسألة الوقت هي اللي كانت نوعا ما مزعجة انك تنتظري إنتهاء الفحص مروا ٤٠ دقيقة ولله الحمد خلص الفحص وكنت مبسوووطة جدا اني اجتزته بنجاح ومن غير اي خوف ، مع اني عندي فوبيا من الاماكن الضيقة والمغلقة بس ربنا سبحانه اذا اراد شيئا بيتم ، ، نصيحة لكل حد من تجربتي وتجربة كتير غيري انك ما تحكم عالاشي قبل ما تجربه ، انا بكل امانة دخلت اجرب وقلت لو مش راح اقدر اتحمل بضغط عالجرس وخلص بينتهي كل شيء ، بس عشان صحتك وعشان ما فيها ضررر لازم تستحملي ، بكل بساطة ما راح يصير شي طالما النفس موجود والهوا بيفوت بشكل طبيعي فقط استرخاء وادعية وصبر وثبات ، الحمدلله على كل حال ، انا كان من سابع الستحيلات اعملها فعلا الحمدلله تذكروا دائما انكن أقوياء بالله 💪
حمدلله على سلامتك عزيزتي، يارب يكتبلك العافية دايما
سبحان الله إنك تيجي هنا بعد ما تكوني خلصتي تجربتك وتطمني غيرك بنصايح حلوة جدا، جزاكي الله كل خير <3
للأسف فيه ناس على الإنترنت وفي الواقع بيخوفنا جدا من كل شيء، ياريت كل اللى بيجرب يقول عن تجربته فعلا زي ما إنتي عملتي علشان نزرع الطمأنينة في نفس الناس اللى تعبانة ومش ناقصة قلق وخوف أكتر من اللى هما فيه أصلا، حتى لو حاجة مؤلمة بس نعرف نعمل إيه غير لما تكون حاجة معقولة بس مجهولة بالنسبة ليا.
ممتنة للغاية لمرورك الغالي، وتمنياتي لك دايما بالعافية
انا جربت الاشعة بالرنين المغناطيسي والصبغة وسمعت ان الصبغة مضرة بعدها حسيت ببرودة في الذراعين وبقالي ٣ ايام حاسة بالبرودة في الذراعينن ومخلف الرقبة والظهر وسمعت ان الصبغة السبب وكمان نظر عنيا مشوش وللاسف قرأت عن الصبغة اللي مع اشعة الرنين وطلعت الجسم مش بيطلعها سعات وبتترسب وبتسبب مشاكل بعدين للاسف مش بيقولوك كدا قبل متعمل اشعة بالصبغة وبيسممو الناس
ألف سلامة عليكي، إنتي محتاجة تراجعي طبيب في أقرب فرصة وتشرحي له الأعراض دي
أنا لست طبيبة، وبحكي عن خبرتي كشخص جرب الحاجات دي ..
أمي جربت أشعة الرنين بعد ما خدت الصبغة
ولم تعاني من نفس الأعراض اللى حكيتي عنها، الصبغة زيها زي أي دوا سيؤثر على الجسم ولكل جسم على حسب طبيعته، بس مظنش إنها مسممة والا كان اتمنع العمل بيها، فيه ناس بتخاف منها وأعطت إشاعات عليها زي حاجات كتيرة متعلقة بالأمراض، للأسف على الأنترنت فيه ناس بتفتي كتير وبتكدب، فاللي هيقدر يساعدك ويعطي حاجات تشفيكي هو الطبيب.. الف سلامة عليكي وإن شاءالله تبقي بخير وعافية.
شكرا ليكي
انا عندي الم في راسي وحجزت موعد وقال لازم اشعه ودخلت وماكملت خفت وغيرت الموعد والى الان متردد ما ادري متى اسويها عارف ان مافيه شي يستدعي للخوف لكن متردد انا ودعوتكم لي اسويها بسلام وريحوتو بالي بكلكم وطمنتوني اكثر مع ان الجهامن احدث الاجهزه ومن المفتوحه بس يارب ييسرها
سلامتك ألف سلامة ما تشوف شر بندر
بالعكس متقعدش تحس أنه مافي داعي للخوف، دي مشاعرك حاول تصدقها وتتفهمها، أنا كمان كنت خايفة وقتها، أي شيء جديد بنعمله أكيد هنحس بالخوف .. بس ممكن نفكر سوا إزاي نشتت الخوف دا .. إننا ندور مثلا على طريقة عمل الجهاز ودا اللى خلاني أكتب عن اليوم اللى عملت فيه علشان لما كنت خايفة وببحث مكنتش فيه معلومات واضحة وكان كله بيتكلم عن أنه خلصها وخلاص، أو أنه حس بالضيق جوه الأنبوب، أو أنهم كانوا قلقانين من النتايج.
صدقني الموضوع مش صعب زي ما أحنا كنا متخيلين، سلي نفسك بالتفكير في حاجات لطيفة وإيجابيه، تذكر أغنية مثلا واقعد دندنها جوه بالك، أو سمع لنفسك آية قرآنية أنت حافظها، أو افتكر مواقف حلوة وعزيزة على قلبك في العموم وحط نفسك في الذكرى دي كإنك بتتفرج على فيلم سينما
هتمر الساعة بسهولة إن شاءالله وهتطمن على حالك، متخفش وهدعيلك كتير، ولو تقدر تيجي تطمني ولو محتاج أي سؤال ياريت تقولي يمكن أعرف أساعد، حتى لو بس هتيجي تحكي مشاعرك وقلقك أنا هكون ممتنة لدا
ربنا يتمم شفائك على خير يارب
شكرا لك على الطاقه الايجايبه وباذن الله راح اسويها وبتوكل ع ربنا وبحيلكمك كل اللي صار وربي يوفقك يارب
ممتنة لردك والله، وهستنا تطمني وأن شاءالله هتبقى بخير
هي بتتعمل بالطرحه ولا لا اقلعها
صعب تتعمل بالطرحة أو الشيلة، ولكنهم بيعطوكي حاجة زي غطاء للرأس بتاع العمليات دا متقلقيش
بجد انا بشكرك جدا عشان الدكتور طلبها مني وخوفت اعملها ورايحه اكشف بكره عند دكتور تاني وكنت خايفه يطلبها مني تاني بس سؤال هي بتاخد كام يوم عشان تتطلع النتيجه
يارب بالعافية ويحفظكم من الشر.. سعيدة أن البوست ساعدكم
النتيجة بتطلع على حسب معمل الأشعة، ولكن أعتقد مش هيكون أقل من 3 أيام عمل
الحمدلله تطور الطب ، سبق وعملتها في ملفي الطبي ٣٢ مرة وكانت أشعة الرنين المغناطيسي المعروفه ولكن الان صار فيه شي اسمه open mri نفسها بس الاشعة المفتوحه يعني تكسر خوفك ان شاء الله من الاماكن المغلقه وتقدر تسويها وانت مرتاح عملتها قبل اسبوع والحمدلله ماكان فيه خوف ابداً
بالفعل وجود نوع أشعة مفتوح راعى المشاكل النفسية لدى بعض المرضى الذين يعانون من الخوف من الأماكن المغلقة، ياليت يتم مراعاة المزيد في الإجراءات الطبية لكي تعم الفائدة وتكون الأمور أسهل .. شاكرة لك مرورك وتعليقك وائل، ممتنة لك بشدة
هل بيكون فيه الم؟ لان عايزة اعمل الرنين على الرحم وبيقولوا فيه بالتخدير ومن غير تخدير
لأسف مجربتش الكشف على الرحم، فمش عايزة أقول معلومة غلط
بس الرنين أعتقد في عمومه كان مش مؤلم، هو يزهق لأنه ساعة تقريبا وصوت التخبيط
سلامتك ألف سلامة