سندويتشات جبنة بالبسطرما

::Photo credit goes to its owner::

الوصفة دي من إبداعات بابا .. دائما لما بنكون هنموت من الجوع بليل ومحدش ليه نِفس يحرك صباع علشان يعمل حاجة .. فيظهر هو بالحل السحري

” سندويتشات الجبنة بالبسطرما”

الموضوع بسيط وباين من إسمه .. عيش فينو حلو كدا طازة من عند أقرب فرن أو توست

ربع جبنة فلامنك وربع جبنة رومي ( يمكن استبدال أي منهم بجبنة نستو أو أي نوع تاني حسب الرغبة)

ربع بسطرما … ( بابا كان بيجيبها خالية من التوم، لإنه مكنتش بيحبه)  بس لو حابين تيجي بالتوم مش هتقول لاء

الوجبة دي بتكفي عدد كبير على حسب ما تقدر تعمل اعمل محدش هيمنعك.

سريعة جدا جدا في عمايلها

أفتح العيش الفينو ، حط كل نوع جبنة لوحده عليه البسطرما ، فكرة تعدد أنواع الجبن علشان لو فيه كذا ذوق في العيلة ..

خليك شاطر وتساوي المكونات داخل السندويتش وميبقاش فيها فراغات ومطبات .. بابا كان بيعرف يحط المكونات بشكل إنه حتى بوز السندويتش بيكون واصله المكونات مش فاضي زي ما المحلات بتفشل إنها تملاه.

جيب صنية مسطحة وحط السندويتشات كلها بحيث يكون الجزء المفتوح من السندويتش من فوق يعني مواجه الهوا …

قبلها تكون فتحت الفرن بدقايق بحيث يكون سخن، مش حابب تفتحه قبلها مفيش مشكلة السندويتشات مش هتعترض .. كله ماشي.

حط الصنية جوه وسيبها شوية، تقريبا 10 دقايق على نار متوسطة .. هتلاقي إن الجبنة ساحت، البسطرما اتحمرت شوية ، السندويتش اتحمر كمان بحيث إنه بقى ناشف شوية صغيرة ومقرمش وبقى حاجة جميلة جدا ..كدا الموضوع خلص.

Leave a Comment