عن افتقاد الاصدقاء والعلاقات

::Photo credit goes to its owner::

مش لازم اقعد اقول لنفسي أنا عملت كذا وكذا وفلان من صحابي معملش ليه …
 
بس ساعات بيجي عليا وقت لما بكون تعبانة نفسيا بحس بالبرودة ..
بتضيع مني قدرتي على التفهم وبحس بالوحدة والإفتقاد وكإنه مش محسوس بيا …
 
 
ايوة بتبقى مُقدر ان صحابك اللى بتحبهم مشغولين، ومش بتطالبهم يردوا عليك بإيميل طويل زي ما انت قاعد هاري نفسك وبكتب لهم .. لإن مش لازم الكل يبقى زيك في طريقة تعبيرك ..
 
بس يوما ما .. يوما ما كدا هتبقى نِفسك يحصل حركة في الموجة ..حاجة تخليك تحس ان الامور مش زي بعضها.
 
مش لازم الموجة تيجي دائما من وسط البحر عالية وقوية زي مشاعرك وإفتقادك ..
 
مفيش مانع انها تطلع من حتة قريبة للشط .. هتبقى موجة حِنيّنة تعدي على وش الرملة والرسومات اللى عليها
تبِلها وتنعمّها ..
 
لان مع الوقت هتحس ان الرسمة اللى على الرملة دي اتخشبت منك .. بقت صلبة ، بتضربها الموجة فمتغيرش فيها ومن صفاتها
 
#تدوينة_كل_يوم
#أكتب_حتى_أكون_بخير
#أكتب_لكي_لا_أكون_وحيدة
#منعا_لتخزين_الحكايات

Leave a Comment