الصلاة من أجل الخلاص من العذاب

::Photo credit goes to its owner::

من الصغر بيحفظونا سواء في عائلاتنا ، بالمدرسة ، بالدروس المرعبة والكريهة لتحفيظ القرآن، الشارع ، حتى في قعدة الصحاب، كلهم ربطوا “الصلاة” بالعذاب .. يعني أنت صلّي بكرامتك علشان ليلتك سودا يوم القيامة لإنك هتدخل النار صف أول ! …

مش مهم بقى إنت هتصلّي إيه .. مش مهم بتصلّي إزاي .. مش مهم إنها بقت حركات محفوظة كرقصة مملة بتتنقر نقر ، ومبروك .. لا بتغيّر فينا حاجة .. ولا قلوبنا بتحس بحاجة .. ولا أصلا أفتكرنا اننا قابلنا ربنا بل إحنا قابِلنا السجادة اللى على الأرض وقلنا كلام واتحركنا حركات ومشينا.

الإرهاب الموجود في كل مكان أصله مننا .. من اللى شيلاه قلوبنا بكراهية أو استهتار أو لا مبالة أو رعب وخوف من “العقاب” مش من “ربنا” ..

ربنا تحول من “ربنااااااا” بكل صفاته وقدراته وأسمائه الحُسنى وفضله إلى نار وعذاب ، أو حور عين وخمور الجنة … الناس بترهبك أو بتحببك من خلال الحاجات دي وكإننا دائما هنفضل بين شقيْ رحى هتهرسنا بينهم.

كنت اتمنى لو هناك عاقل في الأزهر أو في القنوات التليفزيونية يمكنه أن يبدأ بأمور بسيطة تجعل الناس بخير .. لا تجعل داعش وغيرها من الظالمين يزدادوا واحد .. لا تجعل الأبرياء يزدادوا قتيلًا لمجرد كلمات يظنوا إنها ليست مهمة ، ولكنها بتكبر وتنتشر، وفجأة تلاقي أدامك حد مشوّه .. بيطلع تشوّهة علينا.

#تدوينة_كل_يوم

#أكتب_حتى_أكون_بخير

#أكتب_لكي_لا_أكون_وحيدة

#منعا_لتخزين_الحكايات

#صلاة

#دين

#الله

Leave a Comment