تحدي تدوينة يوميا – رقم 12

::Photo credit goes to its owner:: 

من فترة طويلة كنت بتفرج على برنامج فيه شيخ مشهور وكان من الناس اللي ممكن يُسمع لها، لقيته بيقول فتوى مرعبة عن “قتل القطط” بعيدًا أن السائل أكيد مخبول عقليا وسادي.

وقتها رغم صدمة الفتوى اللي أطلقها الشيخ بكل سلاسة، الا إنني كنت ممتنة للموقف دا لأنه “بيفكرني” في كل مرة بمبدأ ماشية عليه.. وهو أن مفيش “بني آدم على وجه الأرض” كلامه مُنزل من السما…

أتعلمت إني أسمع وأفكر وأقرر أخد من كل شخص “المناسب ليا والمنطقي” وأترك الباقي.. مأساتنا إننا بنتربى إننا نشيل الشخص رأي الشخص كله على بعضه..

بنصنع فراعنة بإيدينا وننصدم منهم بعدين.

أعطينا السعودية الألوهية فحاليا الناس مصدومة أن” يا حلاوة دا الدين طلع سهل مش زي زمان”…

وقدسوا “الشعراوي” وغيره فبقوا مش عايزين يسمعوا عنهم أي كلام بيقول لهم أن الناس دي بتغلط وبتعك زي أي بني آدم، فلهم ما لهم وعليهم ما عليهم.

مفيش مُفكر/فنان/صحفي/داعية وغيرهم كتير مظهرش وشه العِكر بعد الثورة واكتشفنا إنهم مجرد “بق على الفاضي”…

لما نتوقف عن تقديس الناس.. لما نتوقف عن أخدهم كلهم شروة واحدة بكل ما فيهم.. ساعتها هنبقى بخير.. علشان هنبقى وسطيين وبنشغل دماغنا مش مجرد قطيع حد بيقوله يمين وشمال وهِش.

#تدوينة_كل_يوم

#اليوم_١٢

Leave a Comment