جنة الفاكهة الأسيوية

قررت زيارة السوبرماركت وشراء فواكه جديدة لم أتذوقها من قبل .. بحثا عن الشغف..

وفعلا على مدار يومين جمعت ٤ أنواع لم أتذوقهم من قبل في صورتهم الأصلية كـ فاكهة.. حيث تناولتهم كـ نكهات ولكن لم أكن على علم بشكلهم

الأنواع بأسمائها الإنجليزية لسهولة البحث عنها وشرائها:

Lyches/ (ليتشي شكلها الخارجي يشبه حبه الفراولة باللون الأحمر ومن الداخل بيضاوية لونها أبيض)

Mangosteen/  (مانجوستين: من الخارج تشبه البنجر ولون قشرتها أسود أو بني غامق، من الداخل تشبه فصوص الثوم الأبيض)

passion fruit/ (فاكهة باشون: بيضاوية قليلا، من الخارج لونها بني ملساء، ومن الداخل عبارة عن بذور صفراء يتم أكلها)

dragon fruit/  (فاكهة دراجون: لها قشور خشنة خضراء تغطي بعض من جسمها الأحمر، من الداخل قلبها أبيض وفيه حب أسود)

أشتريت منهم القليل للتجربة وعدم الإهدار…

بحثت في جوجل كيف يمكنني تقشيرهم وما هي طريقة أكلهم بدل من أكل أحدهم بالقِشر على سبيل الخطأ 😀

“الليتشي” كانت بتعور بسبب جمسها الخارجي الخشن المدبب.. والداخل كانت ناعمة، نأكل الجزء الأبيض ونترك البذر.

“الباشون” حبيبتي وروحي وحياتي <3 حاااااامضة جدا بس حبيت الشعور بتاعها جدا.

“الدراجون” كانت زي طعم الخس بدون نكهة ودا صدمني رغم شكلها المنعش… وصراحة مش عارفة هو أنا اللي حظي جيه في واحدة طعمها مش حلو أو غير ناضجة كفاية ولا دا طعمها فعلا… ولكن شكلها بديع وبيخلي القلب يدق من الفرحة.

“المانجوستين” من عائلة الليتشي كمان وطعمها وشكلها الداخلي قريب زي فصوص فاكهة القشطة.

وأنا بقطع وباكل قفشت نفسي إني فرحانة فرحة صافية مش مُجهدة ولا مبذول فيها أي طاقة، بل هدية مجانية لطيفة وناعمة ومش مطلوب مني حتى أعطي ردة فعل منتظرة أو يتم لومي أنه ليه مش فرحانة وأنه اطلعي بقى من الكآبة دي يا أمنية كإني بشتري الأحزان بمزاجي.. كنت ممتلئة بشعور جميل ورقيق لدرجة إني استغربته جدا كوني بقيت مش عارفة أحس طعم أي أكل أو شرب ومش حاسة بحاجة غير إن التيار واخدني وأنا مفيش طاقة أقاوم.

شكرا للنباتات الحلوة إنها بتمنح قلبي الحزين السعادة <3 (^0^)

#فاكهة

#فاكهة_أسيوية

#نظام_حياة

#صحة

Leave a Comment