بطاطس بالبصل + بطاطس بالكمون

 ::Photo credit goes to its owner::

البطاطس محبوبة جدا عندي، لذا دائما هناك ملايين الوصفات لها 😀

:: بطاطس بالبصل::

معلقة زيت زيتون في حلة متوسطة الحجم، ثم أضع بصل شرايح .. أسيبه لما يتحمر شوية .. بعدها أنزل عليهم بالبطاطس المقطعة صوابع تخينة، أضع توابلي (معلقة صغيرة ملح، فلفل، فلفل أسود، وشوية شطة  وذرات زنجبيل) .. من الأخر البهارات اللى في وشي بحطها .. وكل مرة بحط حاجة جديدة 😀

 أقعد أقلب فيهم شوية مع بعض معتمدة على الميه اللى هتطلع من البطاطس والبصل طبيعي .. مجرد دقايق بس مش أكتر وبعدها أضيف كوب واحد ماء عليهم .. ساعات بحط كوبين لو البطاطس من النوع الجملي اللى بتبقى محتاجة قوة إلهية علشان تستوي ..

وبعدين اقفل الغطا وعلى النار عالية بحيث يحصل غليان للمكونات مرة واحدة فقط وبعدين أنقلها على نار ضعيفة تقعد تعيش مع نفسها بقى .. الميه بتتسحب وتبقى البطاطس طعمها تحفة.

 همسة: ساعات بعمل البطاطس دي بالطماطم، يعني بدل البصل بحط طماطم مُقطعة مُكعبات صغيرة..

simple Break

:: بطاطس بالكمون::

معلقة زيت زيتون في حلة متوسطة الحجم، ثم أضع البطاطس المقطعة مكعبات تخينة أو صوابع تخينة”حسب الرغبة”

كمية كمون لينا وللزمن – من 2 إلى 3 معالق صغيرة .. معلقة صغيرة ملح وفلفل .. تتقلب على النار دقيقة، وبعدها شوية ميه تقريبا نص كُباية لإنه بيعتمد على الميه اللى بتطلع من البطاطس ذات نفسها .. نغطي الحلة بالغطا والنار تبقى عالية.. بعد أول غلوة نخفف النار، واستنا ربع ساعة تقريبا لتصبح جاهزة لما الميه تختفي وتبقى البطاطس جميلة ومغرية جدا للأكل.

ملحوظة: يمكن الإستغناء عن الزيت، بتقليب البصل مع القليل من الماء .. ويمكن الإستغناء عن الملح بوضع ثُماء فهي تعادل شعور الملوحة..

Leave a Comment