القلاية الصحية

::Photos credit goes to its owner::

آخر تحديث تم في مارس 2017 

ملحوظة: الحلّتين المستخدمتين هنا من سنة 2015 تقريبًا، لذا هناك موديلات/أنواع ظهرت جديدة وقد تكون بعض الملاحظات تم علاجها.

لإن معظمنا بيحب المقالي جدًا جدُا وخصوصا الأخت المُبجلة البطاطس ربنا يخليها لينا .. إلى جانب رغبتنا إننا نكون صحيين في طريقة الطهي عامة.

فكان لازم نشوف حل للموضوع دا، وخصوصا إننا مش عايزين نموت بسبب شريان مسدود بسبب عمو الكوليسترول ..

عادة الناس بتواجه مشكلة في اختيار الحلة الأنسب، وممكن بعد ما تشتري المشهور أو بناءً على اقتراحات الناس تكتشف إنها مش حلوة أو مش مفيدة زي ما كانت تتمنى منها.

لأن كل واحد هيتكلم عن الحاجة من وجهة نظره فقط، علشان كدا حبيت أعرض لكم مميزات وعيوب قلايات (تيفال وفيليبس) بشكل حيادي تمامًا، وعند تجربة فعلية معهم .. وعلى حسب تفضيلاتكم أختاروا الأنسب لكم.

النوع الاول: تيفال

Montage ProduitCuvePlateau_Tournedos_TEFAL

   

 فيديو لطيف كدا عنها

https://youtu.be/3Q5f02WjuCU

“تيفال” شركة نضيفة عامة، وفيها مميزات أكتر من عيوبها من وجهة نظري.

– الحلة واجهتها زجاج أو جزء شفاف بيخلينا شايفين الأكل وهو بيتسوى علشان منحسش بالقلق أنه قرب يتحرق وإننا مش شايفين وبتاع ..

– بداخلها جزء في النص بيقوم بتحريك الأكل خلال عملية التسوية، في حالة كان الأكل اللى جوه لين وخايفين يتعجن في بعضه، بيتم ازالة الجزء دا لانه مثبت بـ “كليبس” سهل الفك والتركيب .. وبكدا يتم التسوية ومحتويات الحلة مش بتتحرك.

– معاها معلقة مقياسية علشان نحط بيها الزيت بدل ما نقعد نجيب معلقة وكباية والافلام دي ..

– بالنسبة للزيت المستخدم : بيتم عادة استخدام معلقة زيت نباتي – زيت الزيتون مش بِكر او مش قطفة أولى /زيت الذرة /زيت عباد الشمس – مع الأكل الني، أما الأكل المُجمد فلا يُستخدم معه زيوت….

ممكن عدم استخدام زيت من أساسه ودا التوجه الحالي بالنسبة ليا .. ولكن اعتقد أنه حاليا الموضوع أسهل شوية لإني خدت نفسي بالتدريج واتعودت على زيوت نباتية في الأول، وبعدين زيوت بكميات أقل وأخيرا بوقف استخدام الزيت خالص.

– سهلة الغسل بليفة طريه بالماء والصابون كون سطحها أملس ولا يعلق فيه الطعام.

– عمق الحلة: “التيفال” حلتها مدورة .. عبارة عن دايرة كبيرة.. فسمكها تقريبا بيتوزع على مساحة قطر الدايرة دي..
عملت فيها بطاطس وكانت الكمية مشبعة ولكن أعتقد انها كانت أقل من كمية البطاطس في حلة ” فيليبس” كون الحلة – كما أوضحت- مش عميقة بل مسطحة اكتر.

– عند استخدام القلاية لأول مرة أو على الأقل مرتين بتظهر ريحة منها بتوضح إنها لسه جديدة، زي ما حد يشغل المكيف أول مرة، أو جهاز تنقية لأول مرة.

– لاحظت إن بعض القلايات الباب بتاعها مش بيقفل بإحكام، وصراحة مش عارفة دا عيب صناعة ولا كوننا بنشتري النوعية الأقل جودة من “تيفال” كونها في العروض والتخفيضات ومحدش بيخفض حاجة الا لو فيها عيب ما.

– فيه توقيت لكل أكلة بتضبطيها وتروحي تعملي اللى وراكي وترجعي تلاقي كله تمام.

للأسف واجهت مع الحلة بتاعتي مشكلة إن عند إنتهاء البروجرام ، تظل ترن زي الزنانة ومش بتتوقف عن التحريك الا لو جيت بنفسي قفلتها تماما وعطلت الرن بتاع التايمر، ودا بيعني إني لو تأخرت عن إغلاقها ممكن البطاطس تتحرق لإنها فعليا مش بتتوقف عن العمل الا لو أنا عملت دا بنفسي… و صراحة لا أعرف هل أيضًا بسبب إنها كوالتي / نوعية أقل بسبب إني اشترتها في التخفيضات ولا دا في المُطلق.

 

adnck4

النوع التاني: فيليبس

philips_airfryer_lrg2 

 

فيديو برده لطيف كدا عنها 

  https://youtu.be/BkpwRRvBI_Q

–  كدابين في اصل وشهم في الأعلان لما بيوضحوا إنها بتتميز إنها ليست بحاجة لإضافة زيت.. لاء بنحط .. كاتبين في الكتالوج بتاعها إن لو البطاطس طازة وغير مُجمدة، نضيف لها نص معلقة زيت قبل ما نحطها (يعني نفس القلاية اللى فوق) ومش عارفة ليه بيخبوا الموضوع دا.

– زي ما وضحت فوق، أنه حاليا بدأت امنع استخدام الزيت عموما وطنشت التعليمات اللى في الكتالوج بتاعهم.

– السمبوسة واي حاجات مُجمدة مش بنحط لها زيت لإنها اصلا نصف مقلية قبل التجميد .. مجرد نحطها تستوي وبتطلع مقرمشة وزي الفل.

– الاسكالوب والكفتة والفلافل واي حاجة من اللى كانت زمان بتغطس في الزيت .. دي قبل وضعها في القلاية لازم تمسح عليها بفرشة فيها زيت .. بحيث الصنف يكون خد وشين زيت من فوق ومن تحت وبعدين تتحط عادي مع البروجرام بتاعها وهتبقى تمام.

–  للاسف لا تحتوي على أي معالق لإضافة الزيت.

– فيها جزء معدني مستطيل بيخلي الطاسة الداخلية مقسومة لنصين، في حالة لو عايزين تعملوا صنفين مختلفين في نفس ذات الوقت.. ولكن مع العلم أن النوعين تكون التسوية الخاصة بيهم بتستغرق نفس الوقت .. و إلا لا يتم وضع نوعين مختلفين تمامًا لكل نوع توقيت مختلف.

– عمق الحلة: “فيليبس” تعتبر عميقة من ناحية إن الحلة على شكل طبق عميق.. جربت فيها بطاطس وكانت كمية مشبعة بس لما بفصل الحلة لنصفين كل نصف كميته بتكون قليلة لانه عميق وليس عريض.

– الزرار الموجود في الحلة واللى بيفصل الشبكة عن الجسم، ساعات بيجي عليه وقت بيعلق وبيتنح ومش بيرضى يفصلهم عن بعض.

–  اياكم وفتح باب القلاية وقت الشغل لانها بتبقى شغالة عن طريق ضغط الهوا ودا خطر جدا .. لازم التوقيت يفصل تماما علشان تقدروا تفتحوها بأمان… هو مفيش حاجة تمنعك من فتحتها لإنها مش زي الغسالات اللى ترفض الفتح وقت التشغيل .. بل الباب بيتفتح عادي جدا في أي وقت .. سواء شغالة أو لاء .. انا بس بتكلم عن المخاطر بشكل عام.

–  بيقولوا في الكاتلوج إنه لما نحط حاجة وخاصة البطاطس إننا نقسم البروجرام على مرتين، بحيث نضبط على 10 دقايق مثلا فيفصل، نفتح الباب ونهز المحتوى شوية بقوة علشان ميلزقش وبعدين نقفل الباب ونشغل النص التاني من البروجرام.

– مشكلة الالة دي انها متغطية تماما زي التابوت مش بتشوفي اللى جوه اخباره ايه .. في الاول لما كنا بنمشي زي الكاتلوج بالضبط كان ساعات البطاطس المجمدة بتتحرق ..

– لما بنخلص استخدامها لازم نخرج الباب خالص ونبعده عن القلاية علشان تبرد تماما .. بعدها لازم تتغسل بوضع ميه سخنة مع شوية صابون صغيرة وتركها شوية علشان تدوب الدهون العالقة في الحلة .. ثم بيتم غسلها بسفنجة طرية علشان نبعد عن تجريح الحلة .. ثم تركها تنشف تماما ومن ثم استخدامها تاني.

بالنسبة ليا كنت بشوف أن غسل الشبكة صعب، لإنه عالق فيها دهون أو بقايا، وفيه أماكن صعب الوصول لها بـ “لوفة الأطباق” .. ولو حصل وتم إهمال غسيلها بشكل دوري بعد كل أكله، أو حصل تأخير في غسيلها بتترسب الدهون والبقايا وممكن يحصل صدى وبتكون غير صحية.

adnck4

بث كدا .. لذا بعد القراءة دي .. جيبوا ورقة وقلم واعملوا قائمة بالحاجات والمميزات المهمة ليكي إنتي وبس .. واكتبي عند كل نوع الاختلافات مثال: السعر، سعة الحلة، سهولة التنضيف، أماكن البيع والصيانة، اقدر استخدمها في ايه … الخ

ولما تشتريها ارضي بإختيارك واستمتعي بيها لأن أي حاجة ليها موديلات أحسن هتظهر مع الوقت، وأسعار تانية ودنيا تانية فبلاش تحطي نفسك في ندم من أي نوع هتختاريه لأنه ناسبك إنتي /أنت في الوقت اللى أنتم كنتم محتاجينها فيه.

ونصيحة كمان مرة.. فعلا كل بيت محتاج قلاية صحية علشان احنا اتعودنا مناخدش بالنا من صحتنا وسايبنها على ربنا انه يسترها من عنده.

الاكل الصحي مش لازم علشان دايت .. اصلا دايت الحرمان دا تخلف عقلي وبيأذي الجسم .. الحاجة الصح إننا ناكل كل حاجة بشكل صحيح وبكميات معقولة ونقلل الدهون وكمية العك اللى بندخله جسمنا بدون ما نفكر.

انا اعرف سيدة ألمانية صديقة للعائلة .. بتاكل الاكل صحي فعليا لدرجة إنها بتصنع المكرونة في بيتها .. بتعمل الصلصلات وكل ما تتخيلوه بيتصنع في بيتها .. مستحيل تاكل حاجة مُصنعة وليها مواد حافظة أو ألوان .. وما شاءالله هي وجوزها كبار أوي في السن وصحتهم ممتازة وبيتحركوا وبيروحوا وبيجوا..

ياريت لما أكبر أبقى زيهم بصحة وقوية مش زي الستات والرجالة عندنا لما يتموا 40 بيكونوا شبه الميتين وعندهم كِرش ومش عارفين يروحوا ولا يجوا وعندهم أمراض الدنيا ولا بيتنفسوا زي مخاليق ربنا.

فبجد لو تقدروا تحطوا ميزانية ليها، تحوشوا ليها، وتفكروا جديا إنكم تشتروا القلاية بالنوعيات دي.. علشان تقدروا تاكلوا المقالي زي ما انتم عايزين وفي نفس الوقت القلب ميتضررش ..

6 Comments

  1. Anonymous Reply

    عاوزه اسألك عن الديلونجي هل افضل من التيفال ام لا كقلاية

    • Omnia

      الفكرة اني للأسف مجربتش ماركة “ديلونجي” علشان اقدر احكم عليها .. انا كتبت عن دول بس علشان دول اللى قدرت أجربهم واتكلمت من واقع شيئ حقيقي ملموس وحاولت على قد ما أقدر أكون موضوعية ومدعمش قلاية عن التانية لانه في النهاية أنا مش مستفيدة حاجة اصلا من الشركتين بقدر هو مجرد رأي زي اللى بنشوفه عن الاوتيلات والخدمات وغيرها كمساعدة من شخص خاض التجربة لأشخاص تانية بتفكر في الموضوع.

      نصحيتي انه تقرأ الكلام اللى اتكتب في البوست الموجود في جروب Plant Based Diet (Egypt)
      وبعدين تجيب ورقة وقلم وتقعد تكتب “أنت” كشخص عايز ايه تحديدا من القلاية دي؟ .. وهل تقدر تعمل دا بالفرن أو البوتجاز عادي .. اكتب ايه المشكلة هنا وهناك .. وجرب كام يوم تعمل اللى انت عايزه بإستخدام المتوفر عندك في البيت فعليا وشوف هل بتطلع عينك وبتتمنى شيئ أسهل وأريح ولا متفرقش .. شوف المقدرة المالية تجيب انهي نوع .. شوف أمتى فيه تنزيلات وممكن تحوش فلوس لحد وقتها وهكذا ..

      الموضوع مش عذاب ولا معركة لازم تنتصر فيها بقدر إنه حاجة اخترعوها علشان “تضيف” لحياتك وتسهلها مش أكتر ولا أقل .. وكلهم والله بيعملوا كدا .. الفرق هنا بيكون متفاوت على حسب الرغبة وطبيعة الإنسان نفسه .. فيه ناس تفرق معاها السعر أولا وأخيرا .. ناس تانية يفرق معاها هتقدر تستخدم الجهاز في ايه .. وناس بتفرق معاها طريقة التضيف بعد ما تخلص .. صدقني أي نوع هتشتريه أرضى بيه لإنك اخترته “أنت” مش بتجيبه لفلان وعِلان اللى مش هيستخدموها ولا هيدفعوا تمنها أصلا.

  2. Lovleymeera Reply

    الديلونجى حلوه جدا والطعم طبيعى ومبتحتاجش زيت غير لو الاكل فريش لكن لو مجمد متحطيش بتاخد وقت شويه بس تستاهل ..ولو جبتيها تجيبى الكبيره مش الصغيره

    • Omnia

      ما تخليكي جدعة وتكتبي تفاصيل اكتر عنها
      يعني مثلا ليه اخترتيها هي مش حاجة تانية؟
      ايه اللى تقدري تعمليه فيها
      هل تعبتك في اي حاجة، حتى لو حاجة عبيطة
      قولينا وصفة دايما بتعمليها فيها وبتحبيها

  3. nooor Reply

    السلام عليكم
    شكراً لك على شرح تجربتك، وانا استفدت فعلاً
    وتقريباً حسب كل اللي قريت للآن شفت ان فيليبس افضل وبعدها تيفال
    بس في ناس بيشتكوا من فيليبس من ناحية التنظييف، لكن لما بحثت اكتشفت ان العيب كان في قلاية فيليبس القديمة
    لكن فيليبس صلحت العيب وجابت انواع جديدة حجم صغير وحجم كبير وكلها تمام وانا صراحة حبيت الحجم الصغير لانها مناسبه لي ولأسرتي
    ، وشفت مقال بيشرح الفرق بين انواع قلاية فيليبس 800 جرام بشكل جميل.
    واما الحجم الكبير 1400 جرام فهو اجمل وفيه مميزات افضل بس صراحة غالي .
    اتمنى لك كل خير اخت امنية :)

    • Omnia

      وعليكم السلام
      (^0^)
      سعيدة جدا بالرد، وأن التدوينة بتاعتي كان ليها فايدة بشكل ما، بالفعل عندما قرأت اللينك الخاص بفيليبس لقيت فيه تطورات كتيرة على الموديلات ودا بيوضح أن الشركات فعلا بتطمح في تلبية رغبات العملاء ومعالجة المشاكل بتاعتهم ودا هيعود علينا بالفايدة .. أحنا دائما محتاجين اللى يلبي احتياجنا ويكون سهل علينا علشان مش ناقصين زهق
      شكرا جزيلا جدا جدا على الرد .. ممتنة ليه جدا

Leave a Comment